អាជ្ញាធរបាននិយាយកាលពីថ្ងៃអាទិត្យ (១១ សីហា) ថា សណ្តាប់ធ្នាប់សាធារណៈនៅក្នុងចក្រភពអង់គ្លេស មានស្ថេរភាពឡើងវិញ បន្ទាប់ពីមានការតវ៉ាពីក្រុមស្តាំនិយមជ្រុលជាច្រើនថ្ងៃ ប៉ុន្តែពួកគេបានព្រមានថា ផលប៉ះពាល់នៃភាពចលាចលនេះនឹងនៅតែមានរយៈពេលរាប់ខែ ឬដល់រាប់ឆ្នាំ។

លោក ប៊ីជេ ហារីងតុន (BJ Harrington) ប្រធានក្រុមប្រឹក្សាស្នងការនគរបាលជាតិអង់គ្លេស (NPCC) បាននិយាយថា «ស្ថានភាពនៅក្នុងដែនដីអង់គ្លេស ស្កុតឡេន និងវេលស៍ មានស្ថិរភាពខ្លះហើយក្នុងពេលប៉ុន្មានថ្ងៃចុងក្រោយនេះ ប៉ុន្តែអៀរឡង់ខាងជើង នៅតែប្រឈមមុខនឹង បញ្ហាប្រឈមសំខាន់ៗមួយចំនួន»។

បាតុករស្តាំនិយមជ្រុលបានធ្វើឱ្យកក្រើកប្រទេសចាប់តាំងពីចុងខែកក្កដា ដែលជំរុញដោយការវាយប្រហារដោយកាំបិតសម្លាប់កុមារបីនាក់។ កុបកម្ម បានធ្វើឱ្យមន្ត្រីនគរបាលរងរបួស ចោរកម្មតាមហាងទំនិញ និងការវាយប្រហារលើសណ្ឋាគារដាក់អ្នកស្វែងរកសិទ្ធិជ្រកកោន។

នគរបាលចក្រភពអង់គ្លេសបានត្រៀមលក្ខណៈសម្រាប់លទ្ធភាពនៃការត្រលប់មកវិញនៃកុបកម្មនៅចុងសប្តាហ៍នេះ ដោយសារតែការចាប់ផ្តើមនៃរដូវកាលបាល់ទាត់ថ្មី និងសីតុណ្ហភាពកើនឡើង ប៉ុន្តែស្ថានភាពបានស្ងប់ស្ងាត់បន្តិច លើកលែងតែការតវ៉ាពីក្រុមស្តាំនិយមជ្រុលដាច់ដោយឡែកមួយចំនួនប៉ុណ្ណោះ។ ទោះបីជាយ៉ាងណាក៏ដោយ រដ្ឋមន្រ្តីក្រសួងយុត្តិធម៌ លោកស្រី សាបាណា ម៉ាម៉ូដ (Shabana Mahmood) បាននិយាយថា ឥទ្ធិពលក្នុងពេលប៉ុន្មានថ្ងៃនៃភាពគ្មានសណ្តាប់ធ្នាប់នេះ អាចនឹង «បង្កផលប៉ះពាល់រយៈពេលវែង» ដោយលើកឡើងពីបន្ទុករបស់តុលាការ និងពន្ធនាគារ «ជិតនឹងលើសចំណុះ»៕