អ្នករាយការណ៍របស់សារព័ត៌មាន អាស៊ីអូ (Axios) បាននិយាយកាលពីថ្ងៃអាទិត្យ (១១ សីហា) ដោយដកស្រង់ប្រភពចំនួនពីរថា សហគមន៍ចារកម្មអ៊ីស្រាអែលជឿថា អ៊ីរ៉ង់បានសម្រេចចិត្តវាយប្រហារអ៊ីស្រាអែលដោយផ្ទាល់ ហើយអាចនឹងធ្វើឡើងក្នុងពេលប៉ុន្មានថ្ងៃខាងមុខនេះ។ អ្នករាយការណ៍បន្ថែមថា ការវាយប្រហារនេះនឹងជាការសងសឹកចំពោះការសម្លាប់មេដឹកនាំក្រុមហាម៉ាស លោក អ៊ីស្មេល ហានីយេ (Ismail Haniyeh) ក្នុងទីក្រុងតេអេរ៉ង់ កាលពីចុងខែកក្កដា។ អ៊ីស្រាអែល មិនបានអះអាង ឬបដិសេធការទទួលខុសត្រូវចំពោះការសម្លាប់នេះទេ។

ការវាយតម្លៃស៊ើបការណ៍សម្ងាត់ថ្មីបង្ហាញថា ការវាយប្រហារអាចកើតឡើងមុនពេលកិច្ចចរចាកិច្ចព្រមព្រៀងបទឈប់បាញ់ និងចំណាប់ថ្នូរនៅតំបន់ហ្កាហ្សាដែលបានគ្រោងទុកសម្រាប់ថ្ងៃព្រហស្បតិ៍ (១៥ សីហា) ដែលអាចបង្កគ្រោះថ្នាក់ដល់កិច្ចចរចាដល់អ្វីដែលមន្ត្រីអ៊ីស្រាអែល និយាយថា គឺជាពេលវេលាសំខាន់សម្រាប់លទ្ធភាពនៃកិច្ចព្រមព្រៀង។

ប៉ុន្តែប្រភពមួយដែលដឹងផ្ទាល់ពីការស៊ើបការណ៍សម្ងាត់បាននិយាយថា ស្ថានភាពនៅតែមានភាពរលូន ព្រោះការវាយតម្លៃដែលត្រូវបានព្រាងក្នុងរយៈពេល ២៤ម៉ោងចុងក្រោយនេះអាចមានការផ្លាស់ប្តូរ។ បេសកកម្មរបស់អ៊ីរ៉ង់ ទៅកាន់អង្គការសហប្រជាជាតិ នៅក្នុងសេចក្តីថ្លែងការណ៍មួយកាលពីថ្ងៃសុក្រសប្ដាហ៍មុនបាននិយាយថា «យើងសង្ឃឹមថាការឆ្លើយតបរបស់យើងនឹងត្រូវកំណត់ពេលវេលាជាក់លាក់ និងធ្វើឡើងក្នុងលក្ខណៈមួយដែលមិនធ្វើឱ្យប៉ះពាល់ដល់លទ្ធភាពបទឈប់បាញ់»។

ប៉ុន្តែយោងតាមប្រភពមួយបាននិយាយថា រដ្ឋមន្ត្រីក្រសួងការពារជាតិអ៊ីស្រាអែល លោក យ៉ាវ ហ្កាឡាន់ (Yoav Gallant) បាននិយាយតាមទូរសព្ទកាលពីថ្ងៃអាទិត្យ (១១ សីហា) ជាមួយរដ្ឋមន្ត្រីការពារជាតិអាមេរិក លោក ឡយដ៍ អស្ទីន (Lloyd Austin) ហើយបានប្រាប់លោកថា ការត្រៀមលក្ខណៈយោធារបស់អ៊ីរ៉ង់ បង្ហាញថាអ៊ីរ៉ង់កំពុងត្រៀមខ្លួនសម្រាប់ការវាយប្រហារទ្រង់ទ្រាយធំ៕