តាមរយៈការហៅទូរសព្ទមួយ កាលពីថ្ងៃអាទិត្យ (ទី១១ ខែសីហា) រដ្ឋមន្ត្រីការបរទេសចិន លោក Wang Yi បានប្រាប់រដ្ឋមន្ត្រីការបរទេសស្តីទីរបស់អ៊ីរ៉ង់ថា ប្រទេសចិនគាំទ្រអ៊ីរ៉ង់ការពារ «អធិបតេយ្យភាព សន្តិសុខ និងសេចក្តីថ្លៃថ្នូរជាតិ» របស់ខ្លួន ដោយការលើកឡើងរបស់លោកនេះត្រូវបានគេដឹង នៅក្នុងសេចក្តីថ្លែងការណ៍របស់ក្រសួងការបរទេសចិន។

អំឡុងពេលសន្ទនាគ្នាតាមទូរសព្ទនោះ លោក Wang បានលើកឡើងម្តងទៀតនូវការថ្កោលទោលរបស់ទីក្រុងប៉េកាំង ចំពោះការធ្វើឃាតលើប្រមុខក្រុមហាម៉ាស គឺលោក Ismail Haniyeh ក្នុងទីក្រុងតeអេរ៉ង់ កាលពីថ្ងៃទី៣១ ខែកក្កដា ដោយនិយាយថា ការវាយប្រហារនេះបានរំលោភលើអធិបតេយ្យភាពរបស់អ៊ីរ៉ង់ និងគំរាមកំហែងដល់ស្ថិរភាព ក្នុងតំបន់។

អ៊ីរ៉ង់ និងក្រុមអ៊ីស្លាមហាម៉ាសប៉ាឡេស្ទីន បានចោទអ៊ីស្រាអែលថា បានធ្វើការវាយប្រហារដែលបានសម្លាប់លោក Haniyeh។ ប៉ុន្តែអ៊ីស្រាអែល ទាំងមិនបានអះអាង ឬបដិសេធទទួលខុសត្រូវលើការសម្លាប់នេះឡើយ ដោយហេតុការណ៍នេះបាននាំឲ្យមានការព្រួយបារម្ភថា សង្គ្រាម រវាងអ៊ីស្រាអែល និងក្រុមហាម៉ាសនៅតំបន់ហ្កាហ្សា កំពុងក្លាយជាសង្រ្គាមមជ្ឈិមបូព៌ាធំឡើងៗ។ ចំណែកអ៊ីរ៉ង់បានប្ដេជ្ញាផ្ដល់មេរៀនដល់អ៊ីស្រាអែលយ៉ាងធ្ងន់ធ្ងរ ជុំវិញការធ្វើឃាតនេះ។

ពាក់ព័ន្ធនឹងករណីនោះ ក្រសួងការបរទេសចិន បានឲ្យដឹងថា លោក Wang បានប្រាប់រដ្ឋមន្ត្រីការបរទេសស្តីទីអ៊ីរ៉ង់ លោក Ali Bagheri Khan ថា ការសម្លាប់លោក Haniyeh «បានប៉ះពាល់ដោយផ្ទាល់ដល់ដំណើរការចរចាបទឈប់បាញ់ នៅតំបន់ហ្កាហ្សា ព្រមទាំងធ្វើឲ្យខូចដល់សន្តិភាព និងស្ថិរភាពក្នុងតំបន់»។ លោក Wang ត្រូវបានដកស្រង់សម្តី ដែលនិយាយថា៖ «ប្រទេសចិនគាំទ្រអ៊ីរ៉ង់ក្នុងការការពារអធិបតេយ្យភាព សន្តិសុខ និងសេចក្តីថ្លៃថ្នូរជាតិរបស់ខ្លួន ស្របតាមច្បាប់»។ 

គួរបញ្ជាក់ដែរថា កាលថ្ងៃទី១១ ខែសីហានោះ ប្រធានាធិបតីអ៊ីរ៉ង់ លោក Masoud Pezeshkian បានតែងតាំងលោក Abbas Araqchi ជារដ្ឋមន្ត្រីការបរទេសរបស់ប្រទេស។ លោក Araqchi ធ្លាប់ជាប្រធានអ្នកចរចារបស់អ៊ីរ៉ង់ក្នុងកិច្ចចរចានុយក្លេអ៊ែរពីឆ្នាំ២០១៣ ដល់ឆ្នាំ២០២១៕