រដ្ឋាភិបាលហ្វីលីពីន បាននិយាយនៅថ្ងៃអង្គារ (១៣ សីហា) នេះថា ខ្លួនបានដាក់ការតវ៉ាការទូតប្រឆាំងនឹងទីក្រុងប៉េកាំង បន្ទាប់ពីយន្តហោះរបស់ចិន បានហោះជិតយ៉ាងគ្រោះថ្នាក់ ហើយបានទម្លាក់ឧបករណ៍ផ្សែងផ្ដល់សញ្ញាមួយគ្រាប់នៅក្នុងផ្លូវរបស់យន្តហោះល្បាតរបស់កងទ័ពអាកាសហ្វីលីពីន លើដែនទឹកជម្លោះនៅសមុទ្រចិនខាងត្បូង ខណៈកងទ័ពជើងទឹកហ្វីលីពីន ក៏បានរិះគន់សកម្មភាពនេះថាជា «ការបង្ខិតបង្ខំ កម្រោល និងបំភ្លៃការពិត»។

ហ្វីលីពីន បានខឹងសម្បារចំពោះអ្វីដែលខ្លួនមើលឃើញថាជាសកម្មភាពដ៏គ្រោះថ្នាក់ដោយយន្តហោះចិនពីរគ្រឿង នៅលើដែនទឹក ស្កាបូរ៉ូ ស្ហូល (Scarborough Shoal) កាលពីថ្ងៃព្រហស្បតិ៍ សប្ដាហ៍មុន ដែលជាការប៉ះទង្គិចដែនអាកាសលើកដំបូង ចាប់តាំងពីអរិភាពនៅសមុទ្ររវាងទីក្រុងប៉េកាំង និងទីក្រុងម៉ានីល នៅតំបន់សមុទ្រដ៏មមាញឹកនេះបានផ្ទុះឡើងកាលពីឆ្នាំមុនមក។

ប្រមុខយោធាហ្វីលីពីន លោកឧត្តមសេនីយ រ៉ូមីអូ ប្រនើ ជូនៀ (Romeo Brawner Jr) មិនបានរាយការណ៍ពីការរងរបួស ឬការខូចខាតណាមួយឡើយ ប៉ុន្តែបានថ្កោលទោសចំពោះសកម្មភាពរបស់ចិន ដែលលោកនិយាយថា អាចបណ្តាលឱ្យមានផលវិបាកដ៏អន្តរាយ។

អ្នកនាំពាក្យកងទ័ពជើងទឹកហ្វីលីពីន លោក រ៉យ វិនស៊ិន ទ្រីនីដាត (Roy Vincent Trinidad) បាននិយាយថា សកម្មភាពបែបនេះមិនគួរកើតមាននៅក្នុងដែនទឹក ដែលគ្រប់គ្រងដោយច្បាប់អន្តរជាតិទេ ហើយទង្វើរបស់ចិន បានបង្កើនហានិភ័យនៃឧប្បត្តិហេតុដែលមិនគួរកើតឡើង។

ថ្មប៉ប្រះទឹក ស្កាបូរ៉ូ ស្ហូល គឺជាដែនទឹកដ៏ប្រកួតប្រជែងបំផុតមួយរបស់អាស៊ី ដែលមានទីតាំងនៅខាងក្នុងតំបន់សេដ្ឋកិច្ចផ្តាច់មុខរបស់ហ្វីលីពីន ប៉ុន្តែត្រូវបានកាន់កាប់ដោយចិនអស់រយៈពេលជាងមួយទសវត្សរ៍៕