ទីភ្នាក់ងារអាកាសធាតុជាតិកូរ៉េខាងត្បូង បាននិយាយកាលពីថ្ងៃចន្ទ (១២ សីហា) ថាខ្លួនរំពឹងថារលកកម្ដៅដ៏ខ្លាំងក្លានាពេលបច្ចុប្បន្ននឹងបន្តយ៉ាងហោចណាស់រហូតដល់ថ្ងៃទី២២ ខែសីហា ជាមួយនឹងសីតុណ្ហភាពរហូតដល់ពេលនោះនឹងខ្ពស់ខ្លាំងជាងធម្មតា។

កាលពីមុន កូរ៉េខាងត្បូងបានមើលឃើញថា កម្ដៅរដូវក្តៅបានធូរស្រាលបន្ទាប់ពីថ្ងៃទី១៥ ខែសីហា ប៉ុន្តែដោយសារការបន្តបញ្ចូលគ្នានៃប្រព័ន្ធសម្ពាធខ្ពស់ទីបេ និងប៉ាស៊ីហ្វិកខាងជើងលើឧបទ្វីបកូរ៉េ រដ្ឋបាលឧតុនិយមកូរ៉េ (KMA) រំពឹងថា រលកកម្ដៅបច្ចុប្បន្ននឹងអូសបន្លាយពេលយូរ។

រហូតមកដល់ថ្ងៃទី២២ ខែសីហា សីតុណ្ហភាពពេលព្រឹកត្រូវបានគេរំពឹងថានឹងឡើងដល់ ២៧អង្សារសេ ខណៈសីតុណ្ហភាពពេលថ្ងៃត្រូវបានគេរំពឹងថានឹងមានចន្លោះពី ៣០ ដល់ ៣៤អង្សារសេ។

ទោះជាយ៉ាងនេះក្ដី ដោយសារចំណុចកណ្តាលនៃប្រព័ន្ធសម្ពាធខ្ពស់ដែលត្រួតលើគ្នាទាំងនេះចាប់ផ្តើមផ្លាស់ប្តូរក្នុងសប្តាហ៍នេះ ទីភ្នាក់ងារ KMA បន្ថែមថា ខ្យល់បក់បោកពីភាគខាងលិចដែលបាននាំសីតុណ្ហភាពក្តៅ និងសើមចូលក្នុងប្រទេស នឹងផ្លាស់ប្តូរទៅជាខ្យល់បក់ពីភាគខាងកើតក្តៅ ហើយស្ងួតជាងមុនចាប់ពីសប្តាហ៍នេះ។

ដោយសារតែការផ្លាស់ប្តូរនេះ ទីភ្នាក់ងារអាកាសធាតុជាតិនេះបានព្រមានថា សីតុណ្ហភាពត្រូវបានគេរំពឹងថានឹងកើនឡើងបន្ថែមទៀតនៅក្នុងតំបន់ដ៏ធំល្វឹងល្វើយនៃរដ្ឋធានីសេអ៊ូល និងផ្នែកខាងលិចនៃខេត្ត កាងវ៉ុន (Gangwon) ក្នុងសប្តាហ៍នេះ៕