ការភ័យខ្លាចជាថ្មីនៃការបោសសម្អាតជនជាតិភាគតិចប្រឆាំងនឹងសហគមន៍មូស្លីមរ៉ូហ៊ីងយ៉ា កំពុងកើនឡើង បន្ទាប់ពីមានរបាយការណ៍ថាមនុស្សរាប់រយនាក់ រួមទាំងស្ត្រី និងកុមារត្រូវបានសម្លាប់ដោយការវាយប្រហារយានដ្រូន ខណៈពេលកំពុងភៀសខ្លួនពីអំពើហិង្សានៅក្នុងរដ្ឋរ៉ាឃីន (Rakhine) ភាគខាងលិចសហភាពមីយ៉ាន់ម៉ា កាលពីសប្តាហ៍មុន។

វីដេអូដែលត្រូវបានចែករំលែកយ៉ាងទូលំទូលាយនៅលើប្រព័ន្ធផ្សព្វផ្សាយសង្គម និងត្រូវបានកំណត់ទីតាំងភូមិសាស្ត្រដោយសារព័ត៌មាន CNN បានបង្ហាញសាកសពជាច្រើននៅពាសពេញច្រាំងភក់នៃទន្លេ ណាហ្វ (Naf) ដែលខណ្ឌចែកមីយ៉ាន់ម៉ា ពីបង់ក្លាដែស។ សាកសពបុរស ស្ត្រី និងកុមារអាចត្រូវបានគេឃើញនៅរាយប៉ាយពាសពេញដី។

សាក្សី និងសកម្មជនរ៉ូហ៊ីងយ៉ាបានប្រាប់សារព័ត៌មាន CNN ថា ការវាយប្រហារដោយយានដ្រូនកាលពីថ្ងៃទី០៥ ខែសីហា នោះបានត្រូវចំជនស៊ីវិលដែលកំពុងភៀសខ្លួនចេញពីការប្រយុទ្ធ និងអំពើហិង្សានៅក្នុងភូមិរបស់ពួកគេក្នុងទីក្រុង មួងដាវ (Maungdaw) ភាគខាងជើងរដ្ឋរ៉ាឃីន។ ពួកគេបន្ថែមថា គ្រួសារជនភៀសខ្លួនទាំងនោះកំពុងតែរង់ចាំឆ្លងទន្លេទៅបង់ក្លាដែស នៅពេលការវាយប្រហារកើតឡើង។

របាយការណ៍ដែលមិនបានបញ្ជាក់នោះដាក់ចំនួនអ្នកស្លាប់មានប្រហែល ២០០នាក់ ហើយប្រសិនបើមានការបញ្ជាក់ នោះនឹងក្លាយជាការវាយប្រហារដ៏បង្ហូរឈាមបំផុតមួយប្រឆាំងនឹងជនស៊ីវិលនៅក្នុងសង្គ្រាមស៊ីវិលរយៈពេល ៣ឆ្នាំរបស់មីយ៉ាន់ម៉ា ដែលបានផ្ទុះឡើងបន្ទាប់ពីរដ្ឋប្រហារឆ្នាំ២០២១ របស់យោធា៕