ភ្នំពេញ៖ សេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ចេញ​នៅ​ថ្ងៃ​ទី០៩ ខែកញ្ញា ឆ្នាំ២០២១ បានឱ្យដឹងថា រដ្ឋមន្ត្រីការបរ​ទេ​ស​​នៃប្រទេសកម្ពុជា និងសាធារណរដ្ឋកូរ៉េ ឬ កូរ៉េ ខាងត្បូងមានសុទិដ្ឋិនិយមថា កិច្ចព្រមព្រៀងពាណិជ្ជកម្មសេរីកម្ពុជា-សាធារណកូរ៉េ (CKFTA) ដែល​នឹងត្រូវ​ចុះ​ហត្ថ​លេខានៅដើមខែតុលាខាងមុខនេះ នឹងជួយជំរុញពាណិជ្ជកម្ម និងការវិនិយោគទ្វេភា​គីបន្ថែមទៀត ព្រមទាំងជួយពន្លឿនការស្តារសេដ្ឋកិច្ច នៃប្រទេសទាំង​ពី​រ​ឡើងវិញ នៅក្រោយវិបត្តិកូវីដ-​១៩។

ការលើកឡើងបែបនេះត្រូវបានធ្វើឡើងនៅក្នុងបេសកកម្មរបស់ឯកឧត្តម ប្រាក់ សុខុន ឧបនា យករដ្ឋម​ន្រ្តី រដ្ឋមន្រ្តីការបរទេស និងសហប្រតិបត្តិការអន្តរជាតិ អញ្ជើញ​ទៅបំពេញទស្សនកិច្ចផ្លូវការនៅសាធារ​​ណ​រដ្ឋកូរ៉េ ពីថ្ងៃទី៦ ដល់ទី៨ ខែកញ្ញា ឆ្នាំ២០២១។

ប្រភពដដែលឱ្យដឹងទៀតថា ក្នុងអំឡុងពេលទស្សនកិច្ចនេះ រដ្ឋមន្រ្តីនៃប្រទេសទាំងពីរបានជួបពិភាក្សាទ្វេ​ភាគី និងធ្វើជាសហ​ប្រធាននៃ​កិច្ច​ប្រជុំ​រដ្ឋមន្រ្តី​ការ​បរ​ទេ​សមេគង្គ-សាធារណរដ្ឋកូរ៉េលើកទី១១ផង ដែរ។

នៅក្នុងកិច្ចប្រជុំទ្វេភាគីនៅព្រឹកថ្ងៃទី៨ ខែកញ្ញា ឯកឧត្តម ប្រាក់ សុខុន និងឯកឧត្តមប្រមុខការទូតកូរ៉េ បា​នកត់សម្គាល់ដោយការពេញចិត្តយ៉ាងខ្លាំង ចំពោះ​ការ​បន្តរីក​ចម្រើននៃទំនាក់ទំនងទ្វេភាគី និងកិច្ចសហប្រតិបត្តិការលើគ្រប់វិស័យរវាងប្រទេសទាំងពីរ ទាំងក្នុងក្របខណ្ឌទ្វេភាគី និងពហុភាគី ដែលឆ្លុះបញ្ចាំងតាម​រយៈ​​​ការផ្លាស់ប្តូរទស្សនកិច្ចជាន់ខ្ពស់ជាញឹកញាប់រវាងប្រទេសទាំងពីរ។

ស្របពេលដែលកម្ពុជា និងសាធារណរដ្ឋកូរ៉េ នឹងប្រារព្ធខួបលើកទី២៥ នៃការបង្កើតទំនាក់ទំនងការទូ​ត​​​ឡើងវិញនៅឆ្នាំក្រោយនេះ រដ្ឋមន្រ្តីការបរទេស​ទាំង​ពីរ​បាន​បញ្ជាក់សាជាថ្មីពីការប្តេជ្ញាចិត្តក្នុងការព​ង្រឹ​ង និងពង្រីកទំនា ក់ទំនងទ្វេភាគីដ៏ល្អដែលមានស្រាប់បន្ថែមទៀត ដើម្បីជាប្រយោជន៍រួម នៃប្រជាជាតិទាំង​ពីរ និង​សម្រាប់សន្តិភាព សន្តិសុខ ស្ថិរភាព និងវិបុលភាពក្នុងតំបន់ និងសកលលោក។

ក្នុង​​ន័យនេះ រដ្ឋមន្រ្តីទាំងពីរបានពិភាក្សាពីមធ្យោបាយ និងវិធីសាស្រ្តក្នុងការធ្វើឱ្យកាន់តែស៊ីជម្រៅនូវកិច្ចសហប្រតិបត្តិការក្នុងវិស័យយោធា ពាណិជ្ជកម្ម ការ​វិនិ​យោគ ​កសិកម្ម ការងារ សុខាភិបាល បច្ចេកវិទ្យាគមនាគមន៍និងព័ត៌មាន វិទ្យាសាស្រ្តនិងនវានុវត្តន៍ ទេសចរណ៍ ការអប់រំ និងបរិស្ថានជាដើម។

រដ្ឋ​មន្រ្តីទាំងពីរ ក៏មានការពេញចិត្ត ដោយបានកត់សម្គាល់ពីស្ថិរភាព នៃទំហំពាណិជ្ជកម្មទ្វេភាគីរវាងប្រទេសទាំងពីរ និងកំណើននៃការវិនិយោគរបស់​កូរ៉េ​នៅ​កម្ពុជា ​ទោះបីជាមានការរីករាលដាលនៃជំងឺកូវីដ-១៩ ក៏ដោយ។ ឯកឧត្តមក៏បានថ្លែងអំណរគុណដល់រដ្ឋាភិបាលកូរ៉េ ក្នុងការផ្តល់ជំនួយអភិវឌ្ឍន៍ដល់កម្ពុជា ដែ​ល​បានរួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ច-សង្គមកម្ពុជា។

ឯកឧត្តម ក៏បានសំដែងនូវអំណរអរគុណរបស់កម្ពុជាចំពោះរដ្ឋាភិបាលកូរ៉េ ដែលបានបរិច្ចាគ និងផ្គត់ផ្គង់សម្ភារៈវេជ្ជសាស្រ្តដល់កម្ពុជា ដើម្បីប្រយុទ្ធប្រឆាំង​នឹង​ជំងឺ​កូវីដ-១៩។

រដ្ឋមន្ត្រីការបរទេសសាធារណរដ្ឋកូរ៉េបានកោតសរសើររាជរដ្ឋាភិបាលកម្ពុជាក្នុងការដាក់ចេញវិធានការប្រកបដោយប្រសិទ្ធភាព ដើម្បីប្រយុទ្ធប្រឆាំង​នឹងជំងឺ​កូវីដ​​-១៩ រួមជាមួយយុទ្ធនាការចាក់វ៉ាក់សាំងទាន់ពេលវេលា នៅទូទាំងប្រទេស។

ឯកឧត្តម ក៏បានវាយតម្លៃខ្ពស់ចំពោះកម្ពុជា ដែលបានផ្តល់ជំនួយដ៏សប្បុរសដល់ប្រទេសជិត​ខាង ដើម្បីជួយប្រទេសទាំងនោះប្រយុទ្ធប្រឆាំងនឹងជំងឺកូវីដ-១៩៕ ដោយ៖ គង់ ឌិន