សមាជិកគណបក្សប្រជាធិបតេយ្យ នឹងបានឮសម្ដីរបស់ប្រធានាធិបតី ៣រូប ទាំងពីអតីត និងបច្ចុប្បន្ន នៅក្នុងសន្និបាតរបស់គណបក្ស នាសប្តាហ៍ក្រោយ ក្នុងទីក្រុង Chicago ជាកន្លែងដែលពួកគេនឹងជួបជុំគ្នាដើម្បីទទួលស្គាល់អនុប្រធានាធិបតី លោកស្រី Kamala Harris ថា ជាបេក្ខជនតំណាងបក្ស និងអបអរសាទរយុទ្ធនាការដ៏គួរឲ្យភ្ញាក់ផ្អើលដែលបានផ្លាស់ប្ដូរស្ថានការណ៍ពីបាតដៃទៅជាខ្នងដៃ។

បើយោងតាមមនុស្សដឹងពីផែនការនេះចំនួន ៣នាក់ ដែលបានទទូចសុំមិនបញ្ចេញឈ្មោះ បានឲ្យដឹងថា ប្រធានាធិបតី លោក Joe Biden ត្រូវបានគេរំពឹងថា នឹងថ្លែងទៅកាន់គណៈប្រតិភូ នៅថ្ងៃទី១៩ ខែសីហា ដែលជាយប់ដំបូងនៃសន្និបាត ដោយអតីតប្រធានាធិបតី លោក Barack Obama ឡើងនិយាយនៅថ្ងៃទី២០ ខែសីហា។

ជាមួយគ្នានេះ បុគ្គល ២រូប បានប្រាប់ថា អតីតប្រធានាធិបតីលោក Bill Clinton និងអតីតរដ្ឋមន្ត្រីការបរទេស លោកស្រី Hillary Clinton ដែលជាបេក្ខជនប្រធានាធិបតីឆ្នាំ២០១៦ របស់គណបក្ស ក៏នឹងឡើងថ្លែងពាក្យពេចន៍ នៅឯសន្និបាតនេះផងដែរ។

មិត្តរួមតំណែងរបស់លោកស្រី Harris គឺអភិបាលរដ្ឋ Minnesota លោក Tim Walz ត្រូវបានគេផ្តល់ឱកាសឲ្យឡើងនិយាយ នៅថ្ងៃទី២១ ខែសីហា។ ហើយលោកស្រី Harris នឹងធ្វើពិធីទទួលការតែងតាំង នៅថ្ងៃទី២២ ខែសីហា ដែលជាថ្ងៃបញ្ចប់ដ៏ធំរបស់សន្និបាតនេះ៕