ប្រធានាធិបតីរុស្ស៊ី លោក Vladimir Putin បានរំលឹកឡើងវិញនូវការអំពាវនាវរបស់លោកឲ្យមានភាពជារដ្ឋពេញលេញរបស់ប៉ាឡេស្ទីន ដោយការលើកឡើងនេះកើតមាននៅក្នុងជំនួបជាមួយប្រមុខអាជ្ញាធរជាតិប៉ាឡេស្ទីន លោក Mahmoud Abbas នាថ្ងៃអង្គារ (ទី១៣ ខែសីហា) នេះ។

អំឡុងការជួបពិភាក្សាគ្នានោះ លោក Putin បានប្រាប់លោក Abbas នៅឯវិមានប្រធានាធិបតី នៅខាងក្រៅទីក្រុងមូស្គូថា៖ «ពួកយើងជឿជាក់ថា ដើម្បីធានាបាននូវសន្តិភាពយូរអង្វែង គួរឲ្យទុកចិត្ត និងស្ថិរភាពនៅក្នុងតំបន់នោះ វាជារឿងចាំបាច់ណាស់ ក្នុងការបង្កើតរដ្ឋប៉ាឡេស្ទីនពេញលេញមួយ»។

ជាមួយគ្នានេះ លោកប្រធានាធិបតីរុស្ស៊ីក៏បានបង្ហាញផងដែរនូវ «ការឈឺចាប់យ៉ាងក្រៃលែង និងការព្រួយបារម្ភយ៉ាងខ្លាំងក្លា» អំពីការបាត់បង់អាយុជីវិតរបស់ជនស៊ីវិល ក្នុងសង្គ្រាមអ៊ីស្រាអែល និងតំបន់ហ្កាហ្សា។ យោងតាមរូបភាព នៅលើកញ្ចក់ទូរទស្សន៍រដ្ឋរុស្ស៊ី បានបង្ហាញឲ្យឃើញលោក Putin ដែលបាននិយាយថា៖ «ពួកយើងមានការព្រួយបារម្ភជាខ្លាំងលើការបាត់បង់អាយុជីវិតជនស៊ីវិល» ដោយលោកបានបន្ថែមថា «យើងកំពុងធ្វើអ្វីៗគ្រប់យ៉ាង ដើម្បីគាំទ្រដល់ប៉ាឡេស្ទីន និងប្រជាជនប៉ាឡេស្ទីន»។

គួរបញ្ជាក់ថា លោក Abbas គ្រោងនឹងបំពេញទស្សនកិច្ច នៅទីក្រុងមូស្គូ កាលពីខែវិច្ឆិកាឆ្នាំមុន ប៉ុន្តែបានពន្យារពេលការធ្វើដំណើរ បន្ទាប់ពីមានហេតុការណ៍កាលពីថ្ងៃទី៧ ខែតុលា ពោលគឺជាការវាយប្រហារយ៉ាងឃោរឃៅលើអ៊ីស្រាអែលដោយក្រុមសកម្មប្រយុទ្ធហាម៉ាសប៉ាឡេស្ទីន ដែលបន្ទាប់មកបង្កឲ្យមានការឆ្លើយតបយ៉ាងធ្ងន់ធ្ងរពីសំណាក់អ៊ីស្រាអែល។

រុស្ស៊ីបានបន្តរក្សាទំនាក់ទំនងការងារ ទាំងជាមួយអ៊ីស្រាអែល អាជ្ញាធរប៉ាឡេស្ទីន និងក្រុមហាម៉ាស ជាក្រុមដែលទីក្រុងម៉ូស្គូមិនបានចាត់ទុកថា ជាអង្គការភេរវជននោះឡើយ៕