អង្គការទេសន្តរប្រវេសន៍អន្តរជាតិ (IOM) បានជំរុញឱ្យប្រទេសនានាបង្កើនការបរិច្ចាគរបស់ពួកគេជាការឆ្លើយតបទៅនឹងវិបត្តិជនភៀសខ្លួនដ៏ធំបំផុតរបស់ពិភពលោកនៅក្នុងប្រទេសស៊ូដង់ ដោយព្រមានកាលពីថ្ងៃអង្គារ (១៣ សីហា) ថាភាពអសកម្មអាចបណ្តាលឱ្យមនុស្សរាប់ម៉ឺននាក់បាត់បង់ជីវិត។

លោក ម៉ូហាម៉េដ រ៉េហ្វាត (Mohamed Refaat) ដែលដឹកនាំបេសកកម្មស៊ូដង់របស់អង្គការ IOM បានប្រាប់សន្និសីទខ្លីមួយថា អង្គការ IOM បានទទួលត្រឹមតែ ២១ភាគរយប៉ុណ្ណោះនៃការគាំទ្រដែលខ្លួនត្រូវការដើម្បីផ្តល់ជំនួយដ៏សំខាន់ដល់ប្រជាជនស៊ូដង់ ដែលញាំញីដោយជម្លោះ ហើយឥឡូវនេះកំពុងប្រឈមមុខនឹងភាពអត់ឃ្លាន ជំងឺ និងទឹកជំនន់។

លោក Refaat បាននិយាយថា៖ «សហគមន៍អន្តរជាតិមិនទាន់បានប្រឹងប្រែងគ្រប់គ្រាន់នៅឡើយទេ។ ប្រសិនបើពុំមានការឆ្លើយតបជាសាកលដ៏ធំ និងសម្របសម្រួលភ្លាមៗទេ យើងកំពុងតែប្រថុយនឹងការមើលឃើញការស្លាប់ដែលអាចការពារបានរាប់ម៉ឺននាក់ក្នុងរយៈពេលប៉ុន្មានខែខាងមុខនេះ»។

យោងតាមអង្គការ IOM បានឱ្យដឹងថា មនុស្សម្នាក់ក្នុងចំណោមប្រាំនាក់ត្រូវបានភៀសខ្លួននៅក្នុងប្រទេសស៊ូដង់ ដោយមានមនុស្ស ១០,៧លាននាក់បានផ្លាស់ទីលំនៅខាងក្នុង និង ២,៣លាននាក់បានភៀសខ្លួនឆ្លងព្រំដែន។ ជម្លោះនៅប្រទេសស៊ូដង់ ដែលបានផ្ទុះឡើងក្នុងខែមេសា ឆ្នាំ២០២៣ បានបញ្ចេញរលកនៃអំពើហិង្សាជនជាតិភាគតិច និងបានបង្កើតស្ថានភាពដូចជាគ្រោះទុរ្ភិក្សនៅទូទាំងប្រទេស៕