ក្រុមហ៊ុនបច្ចេកវិទ្យា ហ្គូហ្គល (Google) ដែលជាបុត្រសម្ព័ន្ធរបស់ក្រុមហ៊ុន អាល់ហ្វាបេត (Alphabet) កាលពីថ្ងៃអង្គារ (១៣ សីហា) បានបើកបង្ហាញស៊េរីស្មាតហ្វូន ភីកស៊ែល (Pixel) ម៉ូដែលថ្មីជាមួយនឹងការរួមបញ្ចូលកាន់តែស៊ីជម្រៅនៃបច្ចេកវិទ្យាបញ្ញាសិប្បនិមិត្ត (AI) ខណៈខ្លួនកំពុងប្រកួតប្រជែងក្នុងការដាក់បញ្ចូល AI ទៅក្នុងប្រព័ន្ធផ្នែករឹង (hardware) របស់ខ្លួន។

ការអាប់ដេតនោះរួមមាន មុខងារតែមួយគត់សម្រាប់ប្រភេទ Pixel (Pixel-only Feature) ដែលអនុញ្ញាតឱ្យអ្នកប្រើប្រាស់ស្វែងរកព័ត៌មានដែលរក្សាទុកក្នុងរូបថតអេក្រង់។ ឥឡូវនេះ អ្នកប្រើប្រាស់ប្រព័ន្ធប្រតិបត្តិការ អែនដ្រយ (Android) ក៏អាចទាញយកប្រព័ន្ធ ជើមីណាយ (Gemini) ដែលជាប្រព័ន្ធសារឆ្លើយតប (chatbot) របស់ Google ដាក់ក្នុងអេក្រង់ត្រួតគ្នានៅលើកម្មវិធីផ្សេងទៀត ដើម្បីឆ្លើយសំណួរ ឬបង្កើតមាតិកា។

ព្រឹត្តិការណ៍បើកបង្ហាញដ៏ធំនៅក្នុងរដ្ឋ កាលីហ្វ័រនីញ៉ា (California) នេះបានដាក់បង្ហាញកំណែចុងក្រោយបំផុតនៃស្មាតហ្វូន Pixel របស់ Google នៅរដូវក្តៅ ដែលជាធម្មតាត្រូវធ្វើឡើងនៅរដូវស្លឹកឈើជ្រុះ ដូចដែល Google ធ្លាប់បានធ្វើលើរាល់ឧបករណ៍ស៊េរីនេះចាប់តាំងពីការចេញលក់ក្នុងឆ្នាំ ២០១៦ មក។

ការបើកបង្ហាញលឿនជាងធម្មតានេះគឺជាកិច្ចប្រឹងប្រែងចុងក្រោយបង្អស់របស់ Google ដើម្បីតាមទាន់គូប្រជែងក្នុងការបញ្ចូលមុខងារ AI ទៅក្នុងផលិតផលដែលមានតម្រូវការខ្ពស់ពីអ្នកប្រើប្រាស់ ហើយព្រឹត្តិការណ៍នេះក៏បានធ្វើឡើងមុនការគ្រោងទុករបស់ Apple ដែលប្រកាសថាខ្លួននឹងបញ្ចេញ iPhone ស៊េរីថ្មីនៅក្នុងខែកញ្ញា។

ភីកស៊ែល ណាញ (Pixel 9) ជាម៉ូដែលអេក្រង់ទំហំ ៦,៣អ៊ីញ នឹងលក់រាយក្នុងតម្លៃចាប់ពី ៧៩៩ដុល្លារ ដែលថ្លៃជាងម៉ូដែលមុនចំនួន ១០០ដុល្លារ។ ម៉ូដែលនេះ និង ផីកស៊ែល ណាញ ប្រូ អ៊ិចអែល (Pixel 9 Pro XL) អេក្រង់ ៦,៨អ៊ីញ នឹងចាប់ផ្តើមការដឹកជញ្ជូននៅចុងខែសីហា។ ភីកស៊ែល ណាញប្រូ (Pixel 9 Pro) ដែលភ្ជាប់មកជាមួយមុខងារបន្ថែមដូចជាកាមេរ៉ាល្អជាងមុន ហើយ ផីកស៊ែល ណាញប្រូ ហ្វូល (Pixel 9 Pro Fold) ដែលអាចបត់អេក្រង់បាន នឹងដឹកជញ្ជូននៅខែកញ្ញា៕