ស្ថាប័នសុខភាពសាធារណៈកំពូលរបស់ទ្វីបអាហ្រ្វិក បានប្រកាសនូវអ្វីដែលខ្លួនហៅថា «ភាពអាសន្នផ្នែកសុខភាពសាធារណៈនៃសន្តិសុខទ្វីប» កាលពីថ្ងៃអង្គារ ជុំវិញការផ្ទុះឡើងជំងឺអុតស្វា ដែលបានរាលដាល មកពីសាធារណរដ្ឋប្រជាធិបតេយ្យកុងហ្គោ ទៅកាន់បណ្តាប្រទេសជិតខាង។

មជ្ឈមណ្ឌលគ្រប់គ្រង និងបង្ការជំងឺអាហ្រ្វិក (Africa CDC) បានព្រមាន កាលពីសប្តាហ៍មុន អំពីអត្រានៃការរាលដាលវីរុសឆ្លងដ៏គួរឱ្យព្រួយបារម្ភ ដែលត្រូវបានចម្លងតាមរយៈទំនាក់ទំនងជិតស្និទ្ធ និងបណ្តាលឱ្យមានរោគសញ្ញាដូចជំងឺផ្តាសាយ និងមានដំបៅ។

ករណីភាគច្រើនមានស្ថានភាពស្រាល ប៉ុន្តែវាអាចធ្វើឲ្យស្លាប់បាន។ អគ្គនាយក លោក Jean Kaseya បាននិយាយនៅក្នុងសន្និសីទសារព័ត៌មានថា «យើងប្រកាសនៅថ្ងៃនេះ ពីភាពអាសន្នផ្នែកសុខភាពសាធារណៈនៃសន្តិសុខទ្វីប ដើម្បីរួមគ្នាក្នុងស្ថាប័ន ឆន្ទៈរួមរបស់យើង និងធនធានរបស់យើង ដើម្បីមានចំណាត់ការយ៉ាងឆាប់រហ័ស និងយ៉ាងរឹងមាំ។

ការផ្ទុះឡើងនៅក្នុងប្រទេសកុងហ្គោ បានចាប់ផ្តើមដោយការរាលដាលវីរុសឆ្លង ដែលត្រូវបានគេស្គាល់ថា Clade I ប៉ុន្តែវីរុសបំប្លែងថ្មីដែលត្រូវបានគេស្គាល់ថា Clade Ib ទំនងជារាលដាលកាន់តែងាយស្រួល តាមរយៈទំនាក់ទំនងជិតស្និទ្ធជាប្រចាំ ជាពិសេសក្នុងចំណោមកុមារ។

លោក Kaseya និយាយនៅក្នុងសន្និសីទថា ទ្វីបនេះ ត្រូវការវ៉ាក់សាំងច្រើនជាង១០លានដូស ប៉ុន្តែមានតែប្រហែល ២០០.០០០ដូស ប៉ុណ្ណោះដែលអាចរកបាន។

លោក បានសន្យាថាមជ្ឈមណ្ឌលគ្រប់គ្រង និងបង្ការជំងឺអាហ្រ្វិក (Africa CDC) នឹងធ្វើការដើម្បីបង្កើនការផ្គត់ផ្គង់ដល់ទ្វីបនេះ ឱ្យបានឆាប់រហ័ស។

លោកនិយាយថា យើងមានផែនការច្បាស់លាស់ក្នុងការធានាបានវ៉ាក់សាំងច្រើនជាង១០លានដូសនៅក្នុងទ្វីបអាហ្រ្វិក ដោយចាប់ផ្តើមពី៣លានដូសនៅឆ្នាំ២០២៤នេះ ប៉ុន្តែពុំបាននិយាយថា វ៉ាក់សាំងនឹងមានប្រភពមកពីណានោះទេ។