ចំហេះព្រៃដ៏អាក្រក់បំផុតប្រចាំឆ្នាំរបស់ប្រទេសក្រិក បានធូរស្រាលបន្តិចនៅជាយក្រុងអាតែន កាលពីថ្ងៃអង្គារ (១៣ សីហា) ដោយសារកម្លាំងខ្យល់ខ្សោយបានផ្អាកការរាលដាលនៃអណ្តាតភ្លើងដ៏បំផ្លិចបំផ្លាញដែលបានសម្លាប់មនុស្សម្នាក់ និងដុតបំផ្លាញរថយន្ត អគារ វាលស្រែ និងព្រៃឈើ ប៉ុន្តេប្រទេសនេះនៅតែស្ថិតក្នុងការប្រុងប្រយ័ត្ន។

ក្រុមពន្លត់អគ្គិភ័យរាប់រយនាក់ដែលគាំទ្រដោយយន្តហោះទម្លាក់ចំនួន ១០គ្រឿងបានទប់ទល់នឹងអណ្ដាតភ្លើងតាំងពីថ្ងៃអាទិត្យមក ខណៈចំហេះរាលដាលពីព្រៃចូលទៅក្នុងជាយក្រុងអាតែន ភាគខាងជើង ដោយបានដុតបំផ្លាញផ្ទះសម្បែង និងបង្កការភ័យស្លន់ស្លោនៅក្នុងតំបន់លំនៅឋាន ដែលមិនដែលជួបប្រទះចំហេះបែបនេះជាច្រើនទសវត្សរ៍មកហើយ។

មន្ត្រីពន្លត់អគ្គិភ័យម្នាក់បាននិយាយថា៖ «ស្ថានការណ៍បានធូរស្រាលហើយ ប៉ុន្តែនៅតែមានចំហេះតូចៗជាច្រើនទៀត។ ពេលនេះមិនមានចំហេះថ្មីទេគឺមានតែការឆាបឆេះឡើងវិញប៉ុណ្ណោះ ប៉ុន្តែយើងនៅតែមានការប្រុងប្រយ័ត្នខ្ពស់»។ រដ្ឋាភិបាលបានប្រកាសផ្តល់សំណង និងវិធានការផ្តល់ជំនួយដល់ជនរងគ្រោះដោយសារចំហេះព្រៃ ដែលក្រុមអ្នកសង្កេតការណ៍ជាតិក្រិកបាននិយាយថា បានបំផ្លាញផ្ទៃដីប្រហែល ១០.០០០ហិកតា។

មូលហេតុនៃចំហេះដ៏សន្ធោសន្ធៅនេះមិនទាន់កំណត់បាននៅឡើយទេ។ ដោយខ្យល់បក់ខ្លាំងរំពឹងថានឹងកើនឡើងម្តងទៀត ក្រិកនឹងនៅតែស្ថិតក្នុងការប្រុងប្រយ័ត្នខ្ពស់ពីចំហេះរហូតដល់ថ្ងៃព្រហស្បតិ៍ (១៥ សីហា) ដោយសីតុណ្ហភាពត្រូវបានព្យាករថានឹងឡើងដល់ ៤០អង្សាសេ៕