ភ្នំពេញ៖ លោកបណ្ឌិត ទូច សុខៈ អ្នកនាំពាក្យរងក្រសួងមហាផ្ទៃ បានព្រមានទៅកាន់ក្រុមនិយមជ្រុល កុំយកលេសប្រធានបទកិច្ចសហប្រតិបត្តិការអភិវឌ្ឍ តំបន់ត្រីកោណ កម្ពុជា ឡាវ វៀតណាម (CLV-DTA) ប្រែក្លាយទៅជាការធ្វើបដិវត្តន៍ពណ៌ បើពុំនោះទេ នឹងត្រូវអនុវត្តន៍តាមច្បាប់ជាដាច់ខាត ។

លោកបណ្ឌិត ទូច សុខៈ បានលើកឡើងថា សមត្ថកិច្ច និងអាជ្ញាធរដែនដីចំណុះក្រសួងមហាផ្ទៃ គាំទ្រដាច់ខាត DYA និងចាត់វិធានការជំនាញ តាមនីតិវិធី និងច្បាប់ លើក្រុមឧក្រិដ្ឋជននយោបាយណា ដែលបានកំពុងរុញសភាពការណ៍នេះ ទៅជាចលនាបដិវត្តន៍ពណ៌ នាំឱ្យវឹកវរសង្គម ប៉ះពាល់សន្តិសុខ និងជីវភាពប្រជាពលរដ្ឋ ។

លោកបានបន្តថា ហេតុ៣យ៉ាង ដែលសមត្ថកិច្ច និងអាជ្ញាធរដែនដីត្រៀមខ្លួនជាស្រេច​ក្នុងការ​បង្ការទប់ស្កាត់ និងបង្ក្រាបក្រុមឱកាសនិយមនោះរួមមាន ដោយហេតុ «៣មិន មានទី១. «មិន» មែនជាការធ្វើឱ្យបាត់បង់ទឹកដីទៅបរទេសណាមួយ ដូចការចោទប្រកាន់ឡើយ, ទី២. «មិន»មែនជាការអភិវឌ្ឍរួមគ្នា ឬចូលហ៊ុនជាមួយគ្នា ដូចការមួលបង្កាច់នោះឡើយ និងទី៣. «មិន»មែនក្លាយជាតំបន់ស្វយ័ត ឬប្រទេសថ្មីមួយឡើយ គឺដីខ្មែរគ្រប់គ្រងដោយខ្មែរ ។

អ្នកនាំពាក្យរងក្រសួងមហាផ្ទៃ បានគូសបញ្ជាក់ថា ការយកប្រធានបទនេះ ធ្វើជាលេសរុញ​ស្ថានការណ៍ឱ្យក្លាយជា «បដិវត្តន៍ពណ៌» ពុំមែនជាសេរីភាពបញ្ចេញមតិ ឬអំពើដែលច្បាប់​ការពារនោះទេ ។ ផ្ទុយទៅវិញជាបទល្មើសព្រហ្មទណ្ឌ មានធាតុផ្សំបទល្មើសគ្រប់គ្រាន់ក្នុង​ការអនុវត្តច្បាប់​ជាដាច់ខាតពីសំណាក់សមត្ថកិច្ចពាក់ព័ន្ធ ​និងអាជ្ញាធរដែនដី ។

ក្នុងនាមក្រុមអ្នកនាំពាក្យ ​នៃក្រសួងមហាផ្ទៃ ទទូចឱ្យឈប់ជាបន្ទាប់ នូវសកម្មភាពតាមបណ្ដាញ​សង្គម និងគ្រប់មធ្យោបាយ ​និងសូមបងប្អូនទាំងឡាយមេត្តាដកខ្លួនឱ្យផុតពីផែនការខុសតម្រានេះ។ ម្ដងទៀត! ក្រសួងមហាផ្ទៃ ​បានកំណត់មុខសញ្ញាល្មើសក្នុងសមត្ថកិច្ចយ៉ាងណែនក្នុងដៃ ដោយប្ដេជ្ញាការពារសន្តិសុខប្រជាពលរដ្ឋ និងរាជរដ្ឋាភិបាលស្របច្បាប់ឱ្យខាងតែបាន តាមគ្រប់យន្តការច្បាប់ជាទម្រង់វិធានការសរុប កម្លាំងសរុប និងមធ្យោបាយសរុប ៕អត្ថបទ បាន សុខរិទ្ធិ