​កូរ៉េខាងជើង៖ ប្រព័ន្ធ​ផ្សព្វផ្សាយ​រដ្ឋ​បាន​រាយការណ៍​កាលពី​ថ្ងៃ​ព្រហស្បតិ៍​ថា​ ប្រទេស​កូរ៉េខាងជើង​បាន​ប្រារព្ធ​ខួប​លើក​ទី​៧៣ នៃ​ការ​បង្កើត​កូរ៉េខាងជើង​ ដោយ​រៀបចំ​ក្បួន​ព្យុហយាត្រា​យោ​ធា​នៅ​ពេល​យប់​ដោយ បង្ហាញ​ពី​កងទ័ព​កំពុង​ឈរ​តម្រៀបជួរ​គ្នា​ក្នុង​សម្លៀកបំពាក់​ឈុត​ការ​ពារវីរុស ដោយ​ពុំ​មានការ​បង្អួត​មី​ស៊ី​ល​បាលី​ស្ទីក​ដូច​រាល់​ឆ្នាំ​ឡើយ​។​

​ទីភ្នាក់ងារ​ព័ត៌មាន​ផ្លូវការ KCNA បាន​និយាយ​ថា​ លោក Kim Jong Un មេដឹកនាំ​នៃ​រដ្ឋ​ឯកោ​បាន​ចូលរួម​ព្រឹត្តិការណ៍​នេះ ខណៈ​កងកម្លាំង​ប៉ា​រ៉ា និង​សន្តិសុខ​សាធារណៈ​បាន​ចាប់ផ្ដើម​ដើរ​ក្បួន​ព្យុហយាត្រា​នៅ​ទីលាន​ចតុរង្គ Kim Il Sung ក្នុង​រដ្ឋធានី​ព្យុងយ៉ាង​នៅ​ពាក់​កណ្ដាល​អធ្រាត្រ​ថ្ងៃ​ពុធ​។​ ​កាសែត Rodong Sinmun របស់​គណបក្ស​ពលករ​កំពុង​កាន់អំណាច​ បាន​ផ្សព្វផ្សាយ​រូបថត​មនុស្ស​ក្នុង​ឈុត​ពណ៌​ទឹកក្រូច​ ពាក់​ម៉ាស់​វេជ្ជសាស្ត្រ​ជា​និមិត្តរូប​នៃ​កិច្ចប្រឹងប្រែង​ប្រឆាំង​នឹង​វីរុស​កូ​រ៉ូ​ណា ហើយ​កងទ័ព​កាន់​កាំភ្លើង​ និងជើង​ទម្រ​បាញ់​គ្រាប់​រ៉ូ​កែ​តជាច្រើន​ដើរ​ក្បួន​រួមគ្នា​។​

​ប៉ុន្តែ​គេ​ពុំបាន​មើល​ឃើញ​មី​ស៊ី​ល ឬ​និយាយ​នៅ​ក្នុង​របាយការណ៍​នោះ​ទេ ហើយ​លោក Kim មិនបាន​ថ្លែង​សុន្ទរកថា​អ្វី​មិន​ដូច​កាលពី​ខែ​តុលា​ឆ្នាំមុន​ នៅ​ពេល​ដែល​ប្រទេស​នេះ​បាន​រៀប​ចំ​ក្បួន​ព្យុហយាត្រា​យោធា​មុន​ពេល​មេឃ​ភ្លឺ ដោយ​បង្ហាញ​មី​ស៊ី​ល​អន្តរទ្វីប​បាលី​ស្ទីក​ដែល​មិន​ធ្លាប់​ឃើញ​ពីមុន​។​ ​ប្រទេស​កូរ៉េខាងជើង​មិនបាន​បញ្ជាក់​ពី​ករណី​ឆ្លង​ជំងឺ COVID-19 ​ទេ ប៉ុន្តែ​បាន​បិទ​ព្រំដែន​ និង​ដាក់​ចេញ​វិធានការ​ការពារ​យ៉ាង​តឹងរ៉ឹង​ដោយ​មើល​ឃើញ​ថា​ ជំងឺ​រាតត្បាត​សកល​នេះ​គឺជា​បញ្ហា​នៃ​ការ​រស់​រាន​មាន​ជីវិត​របស់​ជាតិ​៕

អត្ថបទ៖ សុខមាន