តុលាការធម្មនុញ្ញរបស់ប្រទេសថៃ កាលពីថ្ងៃពុធ (១៤ សីហា) បានប្រកាសដកតំណែងលោកនាយករដ្ឋមន្ត្រី សេដ្ឋា ថាវីស៊ីន (Srettha Thavisin) ហើយសម្រេចថាលោកបានបំពានក្រមសីលធម៌ដោយបានតែងតាំងរដ្ឋមន្ត្រីមួយរូបដែលធ្លាប់ជាប់ពន្ធនាគារ ដោយបង្កើនទិដ្ឋភាពនៃភាពចលាចលនយោបាយ និងការរង្គោះរង្គើនៅក្នុងសម្ព័ន្ធគ្រប់គ្រង។

សេដ្ឋីអចលនទ្រព្យលោក សេដ្ឋា គឺជានាយករដ្ឋមន្ត្រីទី៤ ក្នុងរយៈពេល ១៦ឆ្នាំ ដែលត្រូវបានដកចេញពីតំណែងក្នុងសាលក្រមដោយតុលាការតែមួយនេះ ដោយគូសបញ្ជាក់ពីតួនាទីនៅកណ្ដាលរបស់ស្ថាប័នតុលាការថៃ ក្នុងវិបត្តិនយោបាយដ៏យូរមកហើយ។

ការចាកចេញរបស់លោក សេដ្ឋា បន្ទាប់ពីកាន់អំណាចតិចជាងមួយឆ្នាំ មានន័យថាសភាត្រូវតែជ្រើសរើសនាយករដ្ឋមន្ត្រីថ្មីនៅថ្ងៃសុក្រ (១៦ សីហា) ស្អែកនេះ ជាមួយនឹងការរំពឹងទុកនៃភាពមិនច្បាស់លាស់បន្ថែមទៀតនៅក្នុងប្រទេស ដែលសេចក្តីសម្រេចរបស់តុលាការបានទម្លាក់រដ្ឋាភិបាល និងគណបក្សនយោបាយជាច្រើន។

គណបក្សភឿថៃ (Pheu Thai) ដែលជាបក្សដ៏ធំបំផុតនៅក្នុងក្រុមចម្រុះ បានចាត់វិធានការយ៉ាងឆាប់រហ័សដើម្បីព្យាយាមពង្រឹងសម្ព័ន្ធភាពរបស់ខ្លួន ហើយបាននិយាយថា ខ្លួននឹងជួបប្រជុំគ្នានៅព្រឹកថ្ងៃព្រហស្បតិ៍ (១៥ សីហា) នេះដើម្បីជ្រើសរើសបេក្ខជនរបស់ខ្លួនជានាយករដ្ឋមន្ត្រី នៅមុនសម័យប្រជុំពិសេសនៃសភាដើម្បីបោះឆ្នោតជ្រើសរើសនាយករដ្ឋមន្ត្រីថ្មី។

លោក សេដ្ឋា បានសម្តែងការខកចិត្ត ហើយបាននិយាយថា វាអាចទៅរួចដែលរដ្ឋាភិបាលបន្ទាប់អាចផ្លាស់ប្តូររបៀបវារៈគោលនយោបាយរបស់លោក។ ក្រុមអ្នកជំនាញផ្នែកនយោបាយមួយចំនួនបាននិយាយថា បក្សភឿថៃ ទំនងជានៅតែស្ថិតក្នុងការដឹកនាំរដ្ឋបាលបន្ទាប់ ទោះបីជាមិនច្បាស់ថាអ្នកណាជាអ្នកកាន់តំណែងបន្ទាប់ក៏ដោយ៕