ស្ថាប័នវាយតម្លៃហិរញ្ញវត្ថុ អេសអេនភី គ្លូប៊ល រ៉េតធីងស៍ (S&P Global Ratings) បាននិយាយកាលពីថ្ងៃពុធ (១៤ សីហា) ថា ភាពចលាចលនយោបាយនៅក្នុងប្រទេសបង់ក្លាដែស ទំនងជាធ្វើឱ្យកំណែទម្រង់ហិរញ្ញវត្ថុដែលបានគ្រោងទុកមានភាពយឺតយ៉ាវ ហើយបានបន្ថែមភាពទន់ខ្សោយនៅក្នុងវិស័យធនាគារដែលកំពុងជួបការលំបាករួចទៅហើយ។

នាយករដ្ឋមន្ត្រី លោកស្រី សេក ហាស៊ីណា (Sheikh Hasina) បានលាលែងពីតំណែង ហើយភៀសខ្លួនទៅឥណ្ឌាកាលពីសប្តាហ៍មុន បន្ទាប់ពីបាតុកម្មដែលដឹកនាំដោយនិស្សិតប្រឆាំងនឹងលោកស្រី បានឈានដល់អំពើហិង្សាដ៏អាក្រក់បំផុតមួយចំនួនចាប់តាំងពីបង់ក្លាដែស ទទួលបានឯករាជ្យពីប៉ាគីស្ថាន នៅឆ្នាំ១៩៧១មក ដែលបានសម្លាប់មនុស្សយ៉ាងហោចណាស់ ៤៥០នាក់ និងរបួសរាប់ពាន់នាក់។

អ្នកវិភាគឥណទាននៅស្ថាប័ន S&P Global Ratings បាននិយាយថា «យើងមើលឃើញហានិភ័យនៃភាពអសកម្មគោលនយោបាយ និងការធ្លាក់ចុះដ៏មានសក្តានុពលនៃកំណែទម្រង់ហិរញ្ញវត្ថុ»។ ទីភ្នាក់ងារវាយតម្លៃនេះបាននិយាយថា ភាពទន់ខ្សោយនៅក្នុងឧស្សាហកម្មធនាគាររួមមាន កង្វះសាច់ប្រាក់ ទ្រនាប់ដើមទុនស្តើង និងគុណភាពទ្រព្យសកម្មកាន់តែអាក្រក់ទៅៗ ខណៈការលាលែងពីតំណែងរបស់ក្រុមមន្ត្រីធនាគារកណ្តាលជាន់ខ្ពស់ អាចពន្យារពេលកំណែទម្រង់រចនាសម្ព័ន្ធដែលកំពុងបន្ត។

រដ្ឋាភិបាលបណ្ដោះអាសន្នមួយត្រូវបានតែងតាំងដើម្បីបិទចន្លោះប្រហោងនយោបាយ និងរៀបចំការបោះឆ្នោត ប៉ុន្តែការតវ៉ាបានពង្រីកដល់គោលដៅលើក្រុមមន្ត្រីដែលត្រូវបានតែងតាំងក្នុងអាណត្តិរបស់លោកស្រី Hasina រួមទាំងប្រធានធនាគារកណ្តាល និងអភិបាលរងចំនួនបួននាក់ ដែលបានលាលែងពីតំណែង។ ទេសាភិបាលធនាគារកណ្តាលថ្មីត្រូវបានតែងតាំងរួចហើយ ប៉ុន្តែភាពមិនច្បាស់លាស់ក្នុងវិស័យធនាគារនៅតែមាន៕