ស្ថានីយ៍ទូរទស្សន៍ក្នុងស្រុក គ្លូបូ (Globo) បាននិយាយកាលពីថ្ងៃពុធ (១៤ សីហា) ថាអាជ្ញាធរស៊ើបអង្កេតការធ្លាក់យន្តហោះប្រេស៊ីល ដែលបានសម្លាប់មនុស្សទាំង ៦២នាក់នៅលើយន្តហោះកាលពីសប្តាហ៍មុននៅទីក្រុង វីញ៉េដូ (Vinhedo) ក្បែរទីក្រុង សៅប៉ូឡូ (Sao Paulo) ឥឡូវនេះមានប្រតិចារិក (ទិន្នន័យបកប្រែ) ពេញលេញនៃ «ប្រអប់ខ្មៅ» ប៉ុន្តែខ្លឹមសារក្នុងនោះមិនបានពន្យល់ភ្លាមៗពីមូលហេតុនៃឧបទ្ទវហេតុនេះទេ។

ទិន្ន័យពីឧបករណ៍ថតសំឡេងកាប៊ីនយន្ដហោះនោះ បង្ហាញថាអ្នកយន្តហោះទីមួយ (ពីឡុត) និងអ្នកបើកយន្តហោះទីពីរ (សហពីឡុត) បានកត់សម្គាល់បញ្ហាពីការបាត់បង់រយៈកម្ពស់ហោះហើរប្រហែលមួយនាទីមុនពេលធ្លាក់ នេះបើតាមទូរទស្ស Globo រាយការណ៍ កាលពីល្ងាចថ្ងៃពុធ ដោយសម្អាងដល់ប្រភពដែលកំពុងធ្វើការស៊ើបអង្កេតលើគ្រោះថ្នាក់នេះ។

យោងតាមទូរទស្សន៍ Globo ទិន្ន័យនេះគ្របដណ្តប់ប្រហែលពីរម៉ោងនៃការថតសំឡេង រួមទាំងសំណួររបស់សហពីឡុតបន្ទាប់ពីគិតថាមានបញ្ហាកំពុងកើតឡើង ហើយនិយាយថា យន្តហោះត្រូវការ «ថាមពលបន្ថែមទៀត» ដើម្បីឱ្យមានស្ថេរភាព។

កងកម្លាំងអាកាសប្រេស៊ីល បាននិយាយកាលពីថ្ងៃសុក្រ សប្ដាហ៍មុននៅក្នុងសេចក្តីថ្លែងការណ៍មួយថា ពីឡុតមិនបានរាយការណ៍ពីស្ថានភាពអាសន្ន ឬលក្ខខណ្ឌអាកាសធាតុមិនល្អអ្វីនោះទេ។ ទូរទស្សន៍ Globo បាននិយាយថា យោងតាមអ្នកដែលកំពុងស៊ើបអង្កេតលើឧបទ្ទវហេតុនេះ ការវិភាគនៃសំឡេងតែម្យ៉ាងនឹងមិនអាចកំណត់មូលហេតុនៃការធ្លាក់ភ្លាមៗបាននោះទេ៕