ស្ត្រីរាប់ម៉ឺននាក់ នៅក្នុងរដ្ឋ West Bengal បានចេញធ្វើបាតុកម្ម កាលពីយប់ថ្ងៃពុធ ដើម្បីប្រឆាំងទៅនឹងការរំលោភ និងសម្លាប់វេជ្ជបណ្ឌិតហាត់ការនៅមន្ទីរពេទ្យរដ្ឋ ក្នុងទីក្រុង Kolkata កាលពីសប្តាហ៍មុន។ ការចេញហែរក្បួនបាតុកម្មនៅពេលយប់ គឺជាចំណុចខ្ពស់នៃការតវ៉ាដ៏ក្ដៅគគុក មានរយៈពេលជិតមួយសប្តាហ៍ ដែលត្រូវបានបញ្ឆេះដោយការសម្លាប់ដ៏ឃោរឃៅ លើអ្នកគ្រូពេទ្យអាយុ៣១ឆ្នាំម្នាក់ នៅមហាវិទ្យាល័យវេជ្ជសាស្ត្រ RG Kar កាលពីថ្ងៃសុក្រមុន។

បន្ទាប់ពីការផ្លាស់ប្តូរវេនដ៏នឿយហត់រយៈពេល៣៦ម៉ោង អ្នកគ្រូពេទ្យបានដេកលក់នៅក្នុងសាលប្រជុំ ដោយសារតែខ្វះកន្លែងសម្រាកដែលបានរៀបចំ។ នៅពេលព្រឹកបន្ទាប់ សហសេវិករបស់នាង បានប្រទះឃើញសាកសពអាក្រាតពាក់កណ្តាលខ្លួនរបស់នាងនៅលើវេទិកាសាលប្រជុំនោះ ដោយមានរបួសធ្ងន់ធ្ងរ។ បុគ្គលិកស្ម័គ្រចិត្តនៅមន្ទីរពេទ្យម្នាក់ ត្រូវបានចាប់ខ្លួន ពីបទជាប់ពាក់ព័ន្ធទៅនឹងបទឧក្រិដ្ឋកម្មនេះ។

ឆ្លើយតបទៅនឹងការអំពាវនាវនៅលើប្រព័ន្ធផ្សព្វផ្សាយសង្គម ស្ត្រីជាច្រើន មកពីគ្រប់មជ្ឈដ្ឋាន បានដើរដង្ហែរបាតុកម្មនៅទូទាំងទីក្រុង Kolkata និងនៅទូទាំងរដ្ឋកាលពីយប់ថ្ងៃពុធដែលមានភ្លៀងធ្លាក់។ ទោះបីជាការតវ៉ាភាគច្រើនធ្វើឡើងដោយសន្តិវិធីក៏ដោយ ពួកគេត្រូវបានរារាំងដោយការប៉ះទង្គិចគ្នារវាងនគរបាល និងបុរសមិនស្គាល់អត្តសញ្ញាណមួយក្រុមតូច ដែលបានសម្រុកចូលមន្ទីរពេទ្យ RG Kar ជាកន្លែងឃាតកម្មរបស់វេជ្ជបណ្ឌិត ហើយបានរុះរើ អង្គភាពសង្គ្រោះបន្ទាន់។

នគរបាលបានបាញ់ឧស្ម័នបង្ហៀរទឹកភ្នែកដើម្បីបំបែកហ្វូងមនុស្សដែលគ្មានរបៀបរៀបរយ។ រថយន្តនគរបាលមួយចំនួន បានរងការខូចខាត។ ការតវ៉ាទ្រង់ទ្រាយតូចៗ ក៏ត្រូវបានធ្វើឡើងនៅក្នុងទីក្រុងជាច្រើនរបស់ប្រទេសឥណ្ឌា។