បើយោងតាមទិន្នន័យ ឆ្នាំ២០២២ ពីក្រសួងសុខុមាលភាពរបស់ប្រទេសជប៉ុន បានឲ្យដឹងថា ចំនួនខ្ពស់បំផុតនៃគូស្វាមីភរិយារួមរស់ជាមួយគ្នាយូរឆ្នាំ ពោលគឺដែលបានរៀបការយ៉ាងហោចណាស់ក៏រយៈពេល ២០ឆ្នាំ បានលែងលះគ្នា ក្នុងពេលដែលប្រទេសនេះសម្បូរប្រជាជនវ័យចំណាស់។

សារព័ត៌មាន Asahi Shimbun កាលថ្ងៃអង្គារ (ទី១៣ ខែសីហា) បានរាយការណ៍ថា ស្ថិតិបានបង្ហាញថា នៅឆ្នាំ២០២២ គូស្វាមីភរិយាចំនួន ៣៨.៩៩១ បានលែងលះគ្នា បន្ទាប់ពីបានរៀបការជាមួយគ្នាអស់រយៈពេលយ៉ាងហោចណាស់ ២០ឆ្នាំ។ ចំនួននេះគឺជាភាគរយខ្ពស់បំផុតដែលត្រូវបានកត់ត្រា គិតចាប់តាំងពីការប្រមូលទិន្នន័យបានចាប់ផ្តើមធ្វើឡើង នៅឆ្នាំ១៩៤៧។

យ៉ាងណាក្ដី នៅឆ្នាំ២០២២ គូស្វាមីភរិយាចំនួន ១៧៩.០៩៩គូ បានលែងលះគ្នា ដែលបង្ហាញពីការថយចុះជិត ៤០ភាគរយពីកំណត់ត្រាលែងលះ ២៨៩.៨៣៦គូ ដែលត្រូវបានសង្កេតឃើញក្នុងឆ្នាំ២០០២។

ក្រុមធំបំផុតនៃការលែងលះ នាឆ្នាំ២០២២ ពាក់ព័ន្ធនឹងគូស្វាមីភរិយាចំនួន ៥២.៦០៦គូ ឬជាង ៣០ភាគរយដែលបានលែងលះគ្នាក្នុងរយៈពេល ៥ឆ្នាំនៃអាពាហ៍ពិពាហ៍។ ប៉ុន្តែទាំងចំនួន និងភាគរយនៃចំណងអាពាហ៍ពិពាហ៍រយៈពេលខ្លីទាំងនេះ បាន និងកំពុងធ្លាក់ចុះ ដែលទំនងជាដោយសារតែការថយចុះទាំងមូលនៃចំនួនអាពាហ៍ពិពាហ៍។

សម្រាប់អាពាហ៍ពិពាហ៍រយៈពេលវែងដែលបញ្ចប់ដោយការលែងលះ ទិន្នន័យបានបង្ហាញថា ស្វាមីភរិយា១៦.៤០៤គូ បានបែកបាក់គ្នាបន្ទាប់ពីរស់នៅជាមួយគ្នារយៈពេលពី ២០ឆ្នាំ ទៅ ២៤ឆ្នាំ ១០.៨២៩គូបន្ទាប់ពី ២៥ឆ្នាំ ទៅ ២៩ឆ្នាំ ៥.១៩២គូបន្ទាប់ពី ៣០ឆ្នាំទៅ ៣៤ឆ្នាំ និង ៦.៥៦៦គូ បន្ទាប់ពី ៣៥ឆ្នាំ ឬច្រើនជាងនេះ។

ទោះបីជាមានការថយចុះជាទូទៅនៃចំនួនសរុបការលែងលះក៏ដោយ ក៏តួលេខសម្រាប់អាពាហ៍ពិពាហ៍រយៈពេលវែងដែលបញ្ចប់ដោយការលែងលះ នៅតែមានកម្រិតថេរ ប្រហែល ៤០.០០០គូ សម្រាប់រយៈពេល ២ទសវត្សរ៍ចុងក្រោយនេះ៕