រដ្ឋាភិបាលដែលត្រូវបានទទួលស្គាល់ជាអន្តរជាតិរបស់ប្រទេសយេម៉ែន បានអំពាវនាវឱ្យអង្គការសហប្រជាជាតិ និងអង្គការអន្តរជាតិផ្សេងទៀត ផ្លាស់ប្តូរទីតាំងប្រតិបត្តិការរបស់ពួកគេ ទៅកាន់ទីក្រុងកំពង់ផែ Aden ភាគខាងត្បូង បន្ទាប់ពីការដណ្តើមយកការិយាល័យស្នងការជាន់ខ្ពស់ទទួលបន្ទុកសិទ្ធិមនុស្សអង្គការសហប្រជាជាតិ នៅទីក្រុងសាណា ដោយកងកម្លាំងហ៊ូទី ។

រដ្ឋមន្ត្រីក្រសួងព័ត៌មានប្រទេសយេម៉ែន លោក Moammar Al-Eryani បានចេញសេចក្តីថ្លែងការណ៍មួយតាមប៉ុស្តិ៍ទូរទស្សន៍រដ្ឋ ដោយអំពាវនាវឱ្យ «បេសកកម្មអង្គការសហប្រជាជាតិ ទីភ្នាក់ងារអង្គការសហប្រជាជាតិទាំងអស់ និងអង្គការអន្តរជាតិ ដែលធ្វើប្រតិបត្តិការនៅក្នុងប្រទេសយេម៉ែន ផ្លាស់ប្តូរទីស្នាក់ការកណ្តាលរបស់ពួកគេជាបន្ទាន់ ទៅកាន់រដ្ឋធានី Aden បណ្តោះអាសន្នរបស់ប្រទេស ។

ការអំពាវនាវឱ្យមានការផ្លាស់ប្តូរទីតាំងនេះ ធ្វើឡើងក្នុងការឆ្លើយតបទៅនឹងការកើនឡើងការព្រួយបារម្ភផ្នែកសន្តិសុខ និងការកើនឡើងការលំបាកក្នុងការក្សាប្រតិបត្តិការផ្នែកការទូត និងមនុស្សធម៌ នៅក្នុងតំបន់ ដែលស្ថិតនៅក្រោមការគ្រប់គ្រងរបស់ក្រុមហ៊ូទី។

ប្រធានសិទ្ធិមនុស្សអង្គការសហប្រជាជាតិ លោក Volker Türk បានថ្កោលទោសយ៉ាងខ្លាំងចំពោះការវាយប្រហារលើការិយាល័យសិទ្ធិមនុស្សរបស់អង្គការសហប្រជាជាតិនៅទីក្រុងសាណា ធ្វើឡើងដោយកងកម្លាំងហ៊ូទី ដោយនិយាយថា ឧបទ្ទវហេតុនេះគឺជា ការវាយប្រហារដ៏ធ្ងន់ធ្ងរលើសមត្ថភាពរបស់អង្គការសហប្រជាជាតិក្នុងការអនុវត្តអាណត្តិរបស់ខ្លួន។

នៅក្នុងសេចក្តីប្រកាសព័ត៌មាន លោកបានទាមទារឲ្យ កងកម្លាំងហ៊ូទី ត្រូវតែចាកចេញពីទីតាំងនោះ ហើយប្រគល់ទ្រព្យសម្បត្តិ និងទ្រព្យសកម្មទាំងអស់ជាបន្ទាន់ ហើយបានបន្តការអំពាវនាវឱ្យដោះលែងបុគ្គលិកអង្គការសហប្រជាជាតិជាបន្ទាន់ និងដោយគ្មានលក្ខខណ្ឌ នូវអ្នកដែលត្រូវបានឃុំខ្លួនក្នុងប្រទេសយេម៉ែន។