បន្ទាយមានជ័យ៖ ថ្លែងក្នុងឱកាសអញ្ជើញជាអធិបតីភាពបើកបើកវគ្គហ្វឹកហ្វឺន បំប៉នពង្រឹងអង្គភាពតំបន់ប្រតិបត្តិការសឹករងបន្ទាយមានជ័យ នៅថ្ងៃទី១៥ ខែសីហា ឆ្នាំ២០២៤ លោកឧត្តមសេនីយ៍ទោ ឈុន ម៉ៅ មេបញ្ជាការរង យោធភូមិភាគទី៥ មេបញ្ជាការទិសទី១ បន្ទាយមានជ័យ បានបញ្ជាក់យ៉ាងច្បាស់ថា ក្នុងនាមកងកម្លាំង ប្ដេជ្ញាការពារ​ ប្រឆាំងជាដាច់ខាតនូវការប៉ុនប៉ង ប្រមូលផ្ដុំ បាតុកម្មហិង្សាផ្តួលរំលំរាជរដ្ឋាភិបាលស្របច្បាប់ ដោយសារតែមានការញុះញង់ពីជនអគតិមួយក្តាប់តូចនៅក្រៅប្រទេស ដេីម្បីតែងផល​ប្រយោជន៍ខ្លួនឯង ​លាប ពណ៌​លេីរាជរដ្ឋាភិបាល បំផុសព័ត៌មានមិនពិត​ធ្វើឱ្យមានការភាន់ច្រឡំ លេីតំបន់អភិវឌ្ឍន៍តំបន់ត្រីកោណ កម្ពុជា -ឡាវ-វៀតណាម (DTA)។

លោកឧត្តមសេនីយ៍ទោ ឈុន ម៉ៅ ក៏បានបន្តលេីកឡេីងថា ក្រោមការដឹកនាំ​របស់​សម្តេច​មហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់​ចេញគោល​នយោបាយបញ្ចកោណ ដំណាក់កាលទី១ ដោយកំណត់យកអទិភាពគន្លឹះ៥ គឺមនុស្ស ផ្លូវ ទឹក ភ្លើង និង បច្ចេកវិទ្យា ដើម្បីកសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជានាពេលខាងមុខ ដោយក្នុងនោះក៏មានផងដែរ ការកំណត់តួនាទីភារកិច្ចប្រកបដោយភាពច្បាស់លាស់ ក្នុងការ​កែទម្រង់ និងធ្វើទំនើបកម្មកងទ័ព ដោយផ្តោតលើ ទំនើបកម្មរចនាសម្ព័ន្ធហ្វឹកហ្វឺន និងគ្រឿងបំពាក់​សម្រាប់កងយោធពលខេមរភូមិន្ទ ​ការពារអធិបតេយ្យភាពជាតិ ទប់ស្កាត់រាល់ការ រំលោភបំពាន និងការប៉ុនប៉ងធ្វើ​បដិវត្តពណ៌​តាមគ្រប់រូបភាព ដោយគោរពអនុវត្តតាមផែនការ កំណែទម្រង់របស់​មេបញ្ជាការកងទ័ពជើងគោក យោធភូមិភាគទី៥។

បេីតាមការបញ្ជាក់ពីលោកឧត្តមសេនីយ៍ត្រី ជឹម ប៊ុនអាន មេបញ្ជាការ តំបន់ប្រតិបត្តិការសឹករង​បន្ទាយមានជ័យ បានឱ្យដឹងថា អនុវត្តតួនាទីភារកិច្ច បទបញ្ជាសារាចរ សេចក្តីណែនាំ ប្រកបដោយការទទួលខុសត្រូវខ្ពស់ អង្គ ភាពតំបន់ប្រតិបត្តិការសឹករងបន្ទាយមានជ័យ បានខិតខំបន្តនិរន្តរភាពលើការងារហ្វឹកហ្វឺន ដើម្បីពង្រឹងសមត្ថភាពយោធិនសំដៅលើ យុទ្ធវិធី ឋានលេខា បច្ចេកទេសអាវុធថ្មើរជើង លំហាត់យុទ្ធដំណើរ ទ័ព និងបង្ក្រាប ការងារអប់រំនយោបាយ សតិអារម្មណ៍ ដោយផ្សព្វផ្សាយសភាពការណ៍ថ្មីៗ ដើម្បីបណ្តុះមនសិការ ស្នេហាជាតិ មាតុភូមិ និងប្រជាពលរដ្ឋជាប់ជាប្រចាំ ក្នុងគោលបំណងពង្រឹង សមត្ថភាពយោធិន ធានាបានធនធាន​មនុស្សសម្រាប់បន្តវេនក្នុងភារកិច្ចពង្រឹងប្រៀបការពារជាតិ សុខសន្តិភាព ស្ថេរភាពនយោបាយ សម្រាប់អ្នកជំនាន់ក្រោយ។

លោកបានបញ្ជាក់ថា ​វគ្គហ្វឹកហ្វឺននេះ មានសិក្ខាកាមចំនួន៨០នាក់ យោធាចារ្យ ០៤នាក់ បម្រើការ និងគ្រប់គ្រង ចំនួន០៥នាក់ ដែលរយះពេលចំនួន៩១ថ្ងៃ(ចាប់ពីថ្ងៃទី១៥ ខែសីហា ដល់ថ្ងៃទី១៣ ខែវិច្ឆិកា ឆ្នាំ២០២៤)៕ អត្ថបទ រឿង ចន្ទ្រា