អាជ្ញាធរ និងប្រព័ន្ធផ្សព្វផ្សាយក្នុងស្រុក បាននិយាយ កាលពីថ្ងៃព្រហស្បតិ៍ថា មនុស្សយ៉ាងហោចណាស់៥៤នាក់ បានស្លាប់ដោយសារទឹកជំនន់ បន្ទាប់ពីមានភ្លៀងធ្លាក់ជាបន្តបន្ទាប់ នៅក្នុងខេត្ត Tibesti ភាគខាងជើងប្រទេសឆាដ។

អភិបាលខេត្ត Tibesti និយាយថា ភ្លៀងធ្លាក់ ដែលបានចាប់ផ្តើមតាំងពីថ្ងៃសុក្រសប្តាហ៍មុន និងបន្តរហូតដល់ថ្ងៃពុធសប្តាហ៍នេះ បានបំផ្លាញទ្រព្យសម្បត្តិអស់ជាច្រើន។

ប្រព័ន្ធផ្សព្វផ្សាយក្នុងស្រុករាយការណ៍ថា មនុស្សជាង៥០.០០០នាក់ បានភៀសខ្លួនចេញពីលំនៅឋាន ដោយសារទឹកជំនន់នៅក្នុងខេត្តនេះ។

លោកស្រី Fatime Boukar Kossei រដ្ឋមន្ត្រីទទួលបន្ទុកសកម្មភាពសង្គម សាមគ្គីភាពជាតិ និងកិច្ចការមនុស្សធម៌របស់ប្រទេស បាននិយាយថា ទីជម្រកបណ្តោះអាសន្ន ត្រូវបានបង្កើតឡើងសម្រាប់ទទួលប្រជាជនភៀសខ្លួន។

លោកស្រី Kossei បាននិយាយនៅលើវេទិកាប្រព័ន្ធផ្សព្វផ្សាយសង្គមរបស់លោកស្រី ថា «វាចាំបាច់ណាស់ដែលប្រជាជនរងផលប៉ះពាល់ ទៅតាំងទីលំនៅនៅទីនោះ ដើម្បីជៀសវាងហានិភ័យសុខភាពដែលទាក់ទងទៅនឹងទឹកជំនន់។ វិធានការទាំងអស់ ត្រូវបានធ្វើឡើង ដើម្បីធានាបានសុវត្ថិភាព និងសុខុមាលភាពរបស់ប្រជាជនគ្រប់គ្នានៅលើទីតាំងនោះ។

យោងតាមការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ បានឲ្យដឹងថា ប្រទេសឆាដ បានជួបប្រទះនឹងទឹកជំនន់ ចាប់តាំងពីពាក់កណ្តាលខែឧសភា ដែលបានប៉ះពាល់ដល់ប្រជាជន ២៤៥.០០០នាក់ រួចហើយ ។

អង្គការនេះ បានរាយការណ៍ថា ភ្លៀងធ្លាក់ខ្លាំង និងទឹកជំនន់ដ៏គំហុក បានបណ្តាលឲ្យមនុស្ស៤០នាក់ស្លាប់នៅក្នុងប្រទេសនេះ កាលពីសប្តាហ៍មុន។