ក្រុមអាជីវករនៅតាមផ្សារ បង្ហាញភាពមិនពេញចិត្ត និងប្រឆាំងដាច់ខាតចំពោះការញុះញង់​ឱ្យ​ធ្វើ​បាតុកម្ម​ប្រឆាំងរាជរដ្ឋាភិបាល។ ក្រុមអាជីវករមើលឃើញថា ទង្វើនេះជាសកម្មភាពខុសច្បាប់ បង្ក​ចលាចល បង្កផលប៉ះពាល់ដល់សង្គមជាតិ ដែលកំពុងមានក្ដីសុខសាន្ត។

ប្រធានគណៈកម្មការ ក៏ដូចជាអាជីវករនៅផ្សារ ទួលទំពូង ប្រកាសប្រឆាំងដាច់​ខាត​ចំពោះ​ជន​អគតិ ដែលកំពុងផ្សព្វផ្សាយ ញុះញង់ឱ្យមានការធ្វើបាតុកម្មប្រឆាំង រាជរដ្ឋាភិបាលកម្ពុជា ដោយ​លើក​ហេតុផលចង់ឱ្យកម្ពុជាដកខ្លួនចេញពី កិច្ចសហប្រតិបត្តិការអភិវឌ្ឍន៍តំបន់ត្រីកោណ កម្ពុជា ឡាវ វៀតណាម។

ក្រុមអាជីវករមើលឃើញថា សកម្មភាពញុះញង់ឱ្យធ្វើបាតុកម្មនេះ ជាសកម្មភាពខុសច្បាប់ មាន​ចេតនា​អាក្រក់ ចង់បង្កចលាចល បង្កបញ្ហាដល់សង្គមជាតិ និងបំផ្លិច​បំផ្លាញ​ក្ដីសុខសាន្ត​របស់​កម្ពុជា ក្នុងពេលបច្ចុប្បន្ន។ ក្នុងនាមអាជីវករ និងជាប្រជាពលរដ្ឋកម្ពុជា បានសំណូមពរ​ឱ្យ​បញ្ឈប់​សកម្មភាព​ខុស​ច្បាប់ទាំងនេះខណៈប្រជាពលរដ្ឋខ្មែររាប់លាននាក់ ត្រូវការភាពសុខសាន្ត ត្រូវ​ការ​សុខ​សន្តិភាព ត្រូវការភ្ញៀវទេសចរ ត្រូវការកំណើនសេដ្ឋកិច្ច។

សូមបញ្ជាក់ថា ក្រសួងយុត្តិធម៌ នៃព្រះរាជាណាចក្រកម្ពុជា បានបញ្ជាក់យ៉ាងច្បាស់ថា គម្រោង​ធ្វើ​បាតុកម្ម​របស់ក្រុមជ្រុលនិយម គឺជាទង្វើខុសច្បាប់ ជាផែនការនៃការប្រឆាំងនឹងសន្តិសុខជាតិ មិន​ត្រឹម​តែ​ខុស​ទៅនឹងក្រមព្រហ្មទណ្ឌនៃព្រះរាជាណាចក្រកម្ពុជាប៉ុណ្ណោះទេ ប៉ុន្តែក៏ខុសផងដែរ ទៅ​នឹង​ច្បាប់​ស្តីពីការប្រឆាំងនឹងភេរវកម្ម និងបទប្បញ្ញត្តិជាធរមាន អាស្រ័យ​ទៅ​តាម​ករណី​ប្រព្រឹត្ត​ជាក់​ស្តែង​នីមួយៗ​។

តាមមាត្រា និងទោសទណ័្ឌ ជនដែលប៉ុនប៉ងផ្ដួលរំលំរដ្ឋាភិបាល ដើម្បីដណ្តើមអំណាច តាម​មធ្យោបាយ​ក្រៅ​ពីការបោះឆ្នោត តាមគោលការណ៍នៃលទ្ធិប្រជាធិបតេយ្យសេរីពហុបក្ស ដែល​មាន​ចែង​ក្នុង​រដ្ឋធម្មនុញ្ញ ដែលជាច្បាប់កំពូលរបស់ជាតិ និងច្បាប់ជាធរមាន គឺជាបទ​ឧក្រិដ្ឋកម្ម​ធ្ងន់ធ្ងរ​ត្រូវ​ផ្តន្ទា​ទោសក្រោម «បទល្មើសឧបឃាត» តាមបញ្ញត្តិមាត្រា ៤៥១ និងមាត្រា ៤៥២ នៃ​ក្រម​ព្រហ្មទណ្ឌ ដោយដាក់ពន្ធនាគារពី ១៥ឆ្នាំទៅ៣០ឆ្នាំ ហើយប្រសិន​បើ​ជន​ល្មើស​ជា​អ្នក​រាជ​ការ​សាធារណៈ​ត្រូវ​ដាក់ពន្ធនាគារអស់មួយជីវិត៕ អត្ថបទ៖ គឹម ហុក