​ប្រណាំង​រថយន្ត៖ ​កីឡាករ​អូស្ត្រាលី Daniel Ricciardo បាន​យកឈ្នះ​ការប្រកួត F1 នៅ​ទឹកដី​អ៊ីតាលី​ទីលាន Monza នៅ​ថ្ងៃអាទិត្យ​ម្សិលមិញ​នេះ ស្របពេល​អ្នក​ប្រជែង​ជើងឯក​ពិភពលោក​ទាំងពីរ​នាក់ Max Verstappen និង Lewis Hamilton ប៉ះទង្គិច​គ្នា​ដើរ​ចេញពី​ការប្រកួត​ទាំង​គ្មាន​ពិន្ទុ​។

​​កីឡាករ​របស់​ក្រុម Red Bull, Verstappen និង​កីឡាករ Mercedes, Hamilton ប៉ះទង្គិច​គ្នា​នៅ​ផ្លូវ​បង់​ទី១ នៃ​ជុំ​ទី២៦ ដោយ​រថយន្ត​របស់ Verstappen ខ្ទាត​ឡើង​ពីលើ​រថយន្ត​របស់ Hamilton សំណាងល្អ​ឧបករណ៍​ការពារ​អ្នកបើកបរ​ដែល​ហៅថា Halo នោះបាន​ជួយសង្គ្រោះ Hamilton ពី​ការរង​របួស​ក្បាល​។ ​​គ្មាន​ពិន្ទុ​រាប់​ទេ​សំរាប់​អ្នក​ទាំងពីរ​ដែលមាន​ន័យ​ថា Verstappen នៅតែ​នាំមុខ Hamilton ៥ពិន្ទុ​ដដែល​តែ Verstappen ត្រូវ​ពិន័យ​កាត់​ទី​ចេញដំណើរ ​៣​ចំណាត់ថ្នាក់​នៅ​ការប្រកួត​ទឹកដី​រុស្ស៊ី​ពីរ​សប្តាហ៍​បន្ទាប់​។

​​ងាក​មក​អ្នកឈ្នះ​នៅ​អ៊ីតាលី Daniel Ricciardo មិន​ត្រឹមតែ​ឈ្នះ​តែម្នាក់ឯង​ឱ្យ​ក្រុម McLaren ប៉ុណ្ណោះ​ទេ មិត្ត​រួម​ក្រុម Lando Norris ក៏បាន​បញ្ចប់​នៅ​ចំណាត់ថ្នាក់​លេខ២ ដែរ​ខណៈ​លេខ៣ គឺ Valtteri Bottas លេខ៤ Charles LeClerc​។​ ​នេះ​ជា​ជ័យជំនះ​លេខ១ លេខ២ លើកដំបូង​សំរាប់​ក្រុម McLaren តាំងពី​ឆ្នាំ២០១០ ដែល​ធ្វើ​ដូចគ្នានេះ​នៅ​ទឹកដី​កាណាដា​៕

​អត្ថបទ​៖​នាង សុភា​វុ​ធ