ក្រុមគ្រូពេទ្យហាត់ការនៅឥណ្ឌា រាប់ពាន់នាក់នៅថ្ងៃចន្ទ (១៩ សីហា) នេះបានបដិសេធមិនបញ្ចប់ការតវ៉ារបស់ខ្លួនជុំវិញការរំលោភសម្លាប់មិត្តរួមការងារ ដោយរំខានដល់សេវាមន្ទីរពេទ្យជិតមួយសប្តាហ៍ចាប់តាំងពីពួកគេបានចាប់ផ្តើមសកម្មភាពទូទាំងប្រទេស ដែលទាមទារសុវត្ថិភាពកន្លែងធ្វើការ និងចាត់វិធានការឧក្រិដ្ឋកម្មយ៉ាងឆាប់រហ័ស។

គ្រូពេទ្យនៅទូទាំងប្រទេសបានធ្វើការតវ៉ា និងបដិសេធមិនពិនិត្យអ្នកជំងឺដែលមិនមែនជាករណីសង្គ្រោះបន្ទាន់ បន្ទាប់ពីការសម្លាប់គ្រូពេទ្យហាត់ការវ័យ ៣១ឆ្នាំម្នាក់កាលពីថ្ងៃទី០៩ ខែសីហា ដែលនគរបាលនិយាយថាត្រូវបានរំលោភ និងសម្លាប់ នៅមន្ទីរពេទ្យមួយក្នុងទីក្រុងកុលកាតា (Kolkata) ភាគខាងកើត។

សកម្មជនស្ត្រីបាននិយាយថា ឧបទ្ទវហេតុនេះបានគូសបញ្ជាក់ថា ស្ត្រីនៅក្នុងប្រទេសឥណ្ឌាបន្តទទួលរងអំពើហិង្សាផ្លូវភេទ បើទោះបីជាមានច្បាប់តឹងរ៉ឹង បន្ទាប់ពីការរំលោភបូក និងសម្លាប់និស្សិតអាយុ ២៣ឆ្នាំម្នាក់នៅក្រុងញូវ ដេលី កាលពីឆ្នាំ២០១២ ក៏ដោយ។

រដ្ឋាភិបាលបានជំរុញឱ្យគ្រូពេទ្យត្រឡប់ទៅបំពេញកាតព្វកិច្ចវិញ ខណៈខ្លួនបានបង្កើតគណៈកម្មាធិការមួយដើម្បីស្នើវិធានការកែលម្អការការពារសម្រាប់បុគ្គលិកថែទាំសុខភាព ប៉ុន្តែភាពតានតឹងហាក់មិនបានធូរស្បើយ។ ក្រុមតំណាងឱ្យវេជ្ជបណ្ឌិតហាត់ការនៅក្នុងរដ្ឋ អូឌីសា (Odisha) ដែលជិតខាងរដ្ឋធានីឥណ្ឌា និងនៅរដ្ឋ ហ្គូចារ៉ាត់ (Gujarat) ភាគខាងលិច ក៏បាននិយាយផងដែរថាការតវ៉ារបស់ពួកគេនឹងនៅតែបន្ត៕