ក្រុមហាម៉ាស បានរិះគន់សំណើបទឈប់បាញ់ថ្មីសម្រាប់តំបន់ហ្កាហ្សា ដែលបានបង្ហាញនៅក្នុងទីក្រុងដូហា ប្រទេសកាតា កាលពីសប្តាហ៍មុន ថាជាការបំពេញលក្ខខណ្ឌរបស់នាយករដ្ឋមន្ត្រីអ៊ីស្រាអែល លោក Benjamin Netanyahu ជាពិសេសការបដិសេធរបស់លោក ក្នុងការព្រមព្រៀងចំពោះបទឈប់បាញ់អចិន្ត្រៃយ៍។

ក្រុមហាម៉ាស បានអះអាងថា សំណើនេះស្របតាមការទាមទាររបស់ លោក Netanyahu រួមទាំងការបដិសេធបទឈប់បាញ់អចិន្ត្រៃយ៍ ដោយនៅតែរក្សាការគ្រប់គ្រងច្រករបៀង Netzarim ច្រកឆ្លងកាត់ទីក្រុង Rafah និងច្រករបៀងPhiladelphia ព្រមទាំងដាក់លក្ខខណ្ឌថ្មីៗលើការដោះដូរអ្នកទោស ដែលក្រុមហាម៉ាស និយាយថា រារាំងការបញ្ចប់កិច្ចព្រមព្រៀង។

ក្រុមហាម៉ាស បានចោទប្រកាន់ លោក Netanyahu ឲ្យ «ទទួលខុសត្រូវទាំងស្រុង» ចំពោះការបរាជ័យរបស់ក្រុមអ្នកសម្របសម្រួល រារាំងកិច្ចព្រមព្រៀង និងបង្កគ្រោះថ្នាក់ដល់ចំណាប់ខ្មាំងអ៊ីស្រាអែល ដោយបន្តសកម្មភាពវាយលុករបស់លោកនៅតំបន់ហ្កាហ្សា។

ក្រុមនេះបានរំលឹកឡើងវិញនូវការប្តេជ្ញាចិត្តរបស់ខ្លួនចំពោះកិច្ចព្រមព្រៀងដែលបានឈានដល់កាលពីថ្ងៃទី២ ខែកក្កដា ដោយផ្អែកលើការប្រកាសរបស់ប្រធានាធិបតីសហរដ្ឋអាមេរិក លោក Joe Biden និងសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដោយជំរុញឱ្យអ្នកសម្របសម្រួលមកពីប្រទេសអេហ្ស៊ីប និងកាតា អនុវត្តលក្ខខណ្ឌដែលបានព្រមព្រៀងគ្នា។

ការិយាល័យរបស់លោក Netanyahu បានសម្តែងអំណរគុណចំពោះកិច្ចខិតខំប្រឹងប្រែងរបស់ក្រុមអ្នកសម្របសម្រួល ហើយសង្ឃឹមថាពួកគេនឹងដឹកនាំក្រុមហាម៉ាសឱ្យទទួលយកលក្ខខណ្ឌនៃសំណើដែលបានធ្វើឡើង កាលពីចុងខែឧសភា។ ទន្ទឹមនឹងនេះ ក្រុមហាម៉ាស ដែលមិនបានចូលរួមដោយផ្ទាល់ បានចោទប្រកាន់អ៊ីស្រាអែលថាបានបន្ថែមលក្ខខណ្ឌថ្មីៗទៅនឹងសំណើដែលបានគាំទ្រកាលពីពេលមុន ហើយបានចោទប្រកាន់រដ្ឋបាលសហរដ្ឋអាមេរិកថា ព្យាយាមបង្កើតបរិយាកាសវិជ្ជមានមិនពិត ដោយបង្ហាញពីការសង្ស័យអំពីលទ្ធផលនៃការចរចា។