ប្រធានាធិបតីកូរ៉េខាងត្បូង លោក យូន សុក យ៉ូល (Yoon Suk Yeol) បានអំពាវនាវឲ្យមានការបង្កើន ការត្រៀមខ្លួនប្រឆាំងនឹងការបង្កហេតុនៅ «តំបន់ពណ៌ប្រផេះ» របស់កូរ៉េខាងជើង និងសង្គ្រាមកូនកាត់   ខណៈដែលកូរ៉េខាងត្បូង និងសហរដ្ឋអាមេរិក បានចាប់ផ្តើមសមយុទ្ធប្រចាំឆ្នាំរបស់ពួកគេ នៅថ្ងៃចន្ទនេះ។

លោក យូន បាននិយាយក្នុងអំឡុងពេលកិច្ចប្រជុំគណៈរដ្ឋមន្ត្រីថា សមយុទ្ធ Ulchi Freedom Shield នៅឆ្នាំនេះ នឹងផ្តោតលើការរួមបញ្ចូលសមត្ថភាពរបស់សម្ព័ន្ធមិត្ត នៅក្រោមស្ថានភាពវិបត្តិផ្សេងៗ ដើម្បីទប់ស្កាត់ការវិវឌ្ឍនៃការគំរាមកំហែងផ្នែកយោធា សង្គ្រាមចិត្តសាស្ត្រ និងការវាយប្រហារតាមអ៊ីនធឺណិតរបស់ប្រទេសកូរ៉េខាងជើង។

លោក យូន បានបញ្ជាក់ថា៖«យើងត្រូវតែពង្រឹងការត្រៀមខ្លួនរបស់យើង ដើម្បីឆ្លើយតបទៅនឹងការបង្កហេតុនៅតំបន់ពណ៌ប្រផេះរបស់កូរ៉េខាងជើង ដូចជាការផ្សព្វផ្សាយព័ត៌មានមិនពិត ព័ត៌មានក្លែងក្លាយ និងការវាយប្រហារតាមអ៊ីនធឺណិតជាដើម»។ «កងកម្លាំងប្រឆាំងរដ្ឋដែលគំរាមកំហែងលទ្ធិប្រជាធិបតេយ្យសេរី កំពុងប្រតិបត្តិការដោយសម្ងាត់ នៅកន្លែងផ្សេងៗ»។

លោកប្រធានាធិបតីកូរ៉េខាងត្បូងរូបនេះ បានក៏ព្រមានថា កូរ៉េខាងជើង អាចនឹងស្វែងរកការបង្កើតអស្ថិរភាពសង្គមតាមរយៈអំពើហិង្សា ការឃោសនា និងការជំរុញឲ្យកើតឡើងនូវដំណាក់កាលដំបូងនៃជម្លោះ។