មន្ត្រីការពារស៊ីវិល និងអាជ្ញាធររបស់ប្រទេសអ៊ីតាលី បាននិយាយថា ប្រតិបត្តិការស្វែងរកកំពុងបន្ត បន្ទាប់ពីមហាសេដ្ឋីបច្ចេកវិទ្យាជនជាតិអង់គ្លេស លោក ម៉ៃ លីញ (Mike Lynch) និងមនុស្ស ៥នាក់ផ្សេងទៀតបានបាត់ខ្លួនក្រោយនាវាកម្សាន្តដ៏ប្រណីតរបស់ពួកគេបានលិចក្នុងអំឡុងពេលព្យុះនៅឯតំបន់ឆ្នេរកោះ ស៊ីស៊ីលី (Sicily) កាលពីព្រឹកថ្ងៃចន្ទ (១៩ សីហា)។ ភរិយារបស់លោក Lynch និងមនុស្ស ១៤នាក់ផ្សេងទៀតបានរួចជីវិត ដោយមានមនុស្សម្នាក់ស្លាប់។

លោក Lynch ដែលត្រូវបានរួចទោសកាលពីខែមិថុនា ក្នុងការកាត់ទោសបទក្លែងបន្លំដ៏ធំនៅសហរដ្ឋអាមេរិក ស្ថិតក្នុងចំណោមមនុស្ស ៦នាក់ដែលនៅតែមិនទាន់សង្រ្គោះបាន បន្ទាប់ពីនាវាកម្សាន្តដែលមានមនុស្សសរុបចំនួន ២២នាក់ បានលិចនៅតំបន់ ប៉តទីឆេឡូ (Porticello) ក្បែរក្រុង ប៉ាលែម៉ូ (Palermo) បន្ទាប់ពីម៉ោង ៤ទៀបភ្លឺ ដោយសារមានព្យុះបង្កើតជាបាតុភូតទឹកកួច។

អាជ្ញាធរជួយសង្គ្រោះបាននិយាយថា សាកសពម្នាក់ត្រូវបានគេរកឃើញ ហើយអ្នកមុជទឹករបស់នគរបាលបានចំណាយពេលពេញមួយថ្ងៃដើម្បីព្យាយាមទៅដល់ទីតាំងនាវាដែលលិចនៅជម្រៅ ៥០ម៉ែត្រ។ សេវាសង្គ្រោះបាននិយាយថា ការស្វែងរកនៅពេលយប់បានប៉ះពាល់នៅពេលដែលលក្ខខណ្ឌអាកាសធាតុកាន់តែអាក្រក់ទៅៗ។

ខ្យល់ព្យុះដ៏កំណាចភ្លាមៗមួយបានវាយលុកតំបន់នោះពេញមួយយប់ ហើយមានប្រភពទឹកកួចបានវាយប្រហារចំទីតាំងដែលនាវាកម្សាន្ត បេស៊ាន (Bayesian) ដោតទង់ជាតិអង់គ្លេស ប្រវែង ៥៦ម៉ែត្រ ត្រូវបានចត បណ្ដាលឱ្យមានឧប្បត្តិហេតុដ៏អាក្រក់បែបនេះកើតឡើង៕