មន្ត្រីសុខាភិបាលម្នាក់ បានប្រាប់សារព័ត៌មាន TASS ថា មនុស្ស ១៧នាក់ បានស្លាប់នៅក្នុងការវាយប្រហាររបស់អ៊ុយក្រែន នៅតំបន់ Kursk នៃព្រំដែនរុស្ស៊ី។

មន្ត្រីរូបនេះ បាននិយាយថា៖«យោងតាមព័ត៌មានចុងក្រោយ មនុស្ស ១៧នាក់ ត្រូវបានសម្លាប់ នៅក្នុងការវាយប្រហាររបស់អ៊ុយក្រែន។ ក្នុងចំណោមអ្នករងរបួសជាង ១៤០នាក់ ៧៥នាក់រួមទាំងកុមារ ៤នាក់ ត្រូវបានបញ្ជូនទៅមន្ទីរពេទ្យ»។

អភិបាលតំបន់ស្តីទីលោក Alexey Smirnov បានប្រាប់ប្រធានាធិបតីរុស្ស៊ីលោក វ្ល៉ាឌីមៀ ពូទីន តាមរយៈតំណភ្ជាប់វីដេអូក្នុងអំឡុងពេលកិច្ចប្រជុំស្តីពីស្ថានភាពនៅព្រំដែនរុស្ស៊ី កាលពីថ្ងៃទី ១២ ខែសីហាថាមនុស្ស ១២នាក់ ត្រូវបានសម្លាប់នៅក្នុងការវាយប្រហាររបស់អ៊ុយក្រែន ដោយ ១២១នាក់ផ្សេងទៀតក្នុងនោះមានកុមារ ១០នាក់ បានរងរបួស។

កាលពីថ្ងៃទី៦ ខែសីហា អ៊ុយក្រែន បានបើកការវាយលុកទ្រង់ទ្រាយធំមួយ នៅតំបន់ Kursk របស់រុស្ស៊ី។ ភាពអាសន្នកម្រិតសហព័ន្ធ ត្រូវបានប្រកាស ហើយសំឡេងស៊ីរ៉ែនវាយប្រហារតាមអាកាស បានបន្លឺឡើងម្តងហើយម្តងទៀតនៅទីនោះ។ យោងតាមក្រសួងគ្រាអាសន្នរុស្ស៊ី មនុស្សជាង ១២១.000 នាក់ ត្រូវបានជម្លៀសចេញពីតំបន់ព្រំដែនចំនួនប្រាំបួន។ អ្នកជម្លៀសជាង ១0.000 នាក់ កំពុងស្នាក់នៅបណ្តោះអាសន្នក្នុង ២៤តំបន់របស់ប្រទេសរុស្ស៊ី។