អាជ្ញាធរសុខាភិបាលដែលប្រញាប់ប្រញាល់ទប់ស្កាត់ការរីករាលដាលនៃមេរោគជំងឺអុតស្វាដ៏រីករាលដាលយ៉ាងឆាប់រហ័សនៅក្នុងសាធារណរដ្ឋប្រជាធិបតេយ្យកុងហ្គោ មានការព្រួយបារម្ភកាន់តែខ្លាំងឡើងថាជំងឺនេះអាចនឹងរីករាលដាលកាន់ឆាប់រហ័ស ដោយសារអាចមានអ្នកឆ្លងជាច្រើនដែលមិនទាន់បង្ហាញរោគសញ្ញា។

ជំងឺអុតស្វា ដែលជាប្រភេទស្រដៀងនឹងជំងឺអុតធំ បានឆ្លងទៅប្រជាជននៅអាហ្វ្រិកខាងលិច និងកណ្តាល ជាមួយនឹងការកើនឡើងកាន់តែញឹកញាប់ចាប់តាំងពីទសវត្សរ៍ឆ្នាំ១៩៧០ មក។ រហូតដល់មានការផ្ទុះឡើងនាពេលបច្ចុប្បន្ននេះ មេរោគអុតស្វាដែលបានឆ្លងរាលដាលទៅកាន់តំបន់ មិនដែលរីករាលដាលយ៉ាងរហ័សបែបនេះរវាងមនុស្សទេ ហើយក៏មិនធ្លាប់ត្រូវបានគេកត់ត្រាថាមានការផ្លាស់ប្តូរញឹកញាប់ដែរ។

ខណៈពេលដែលមនុស្សជាច្រើននៅតែមិនទាន់ដឹងពីមេរោគអុតស្វាប្រភេទរងថ្មីដែលជំរុញឱ្យមានការផ្ទុះឡើងនេះ ល្បឿនដែលវីរុសកំពុងរីករាលដាលគឺជារឿងគួរឱ្យបារម្ភ ដែលអាចបង្ហាញពីហានិភ័យសម្រាប់ជំងឺរាតត្បាតនាពេលអនាគត។ យោងតាមមជ្ឈមណ្ឌលគ្រប់គ្រង និងបង្ការជំងឺរបស់ទ្វីបអាហ្រ្វិក បានឱ្យដឹងថា មេរោគដែលផ្លាស់ប្តូរថ្មីនេះ ទាក់ទងទៅនឹងកំណែដ៏ខ្លាំងក្លាជាងមុនហៅថា ប្រភេទ១ (Clade I) ដែលទទួលខុសត្រូវចំពោះការស្លាប់រាប់រយនាក់នៅកុងហ្គោ ក្នុងឆ្នាំ២០២៤។ ក្នុងចំណោមករណីស្លាប់ទាំងនោះ មានជាង ៦០ភាគរយកើតឡើងលើកុមារអាយុក្រោម ៥ឆ្នាំ។

មិនដូចវីរុសប្រភេទ ២ប៊ី (Clade IIb) ដែលជាមេរោគប្រភេទស្រាលផ្ទុះឡើងក្នុងឆ្នាំ២០២២ និងរីករាលដាលជាចម្បងតាមរយៈបុរសដែលរួមភេទជាមួយបុរសដូចគ្នានោះទេ វីរុសប្រភេទ១បច្ចុប្បន្នកំពុងរីករាលដាលតាមរយៈសកម្មភាពផ្លូវភេទគ្រប់ប្រភេទ និងទំនាក់ទំនងរាងកាយជិតស្និទ្ធផ្សេងទៀត៕