វិមានក្រឹមឡាំងបាននិយាយថា ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) និងមេដឹកនាំតំបន់ ឆេតឈ្នី (Chechen) លោក រ៉ាមហ្សាន កាឌីរ៉ូវ (Ramzan Kadyrov) កាលពីថ្ងៃអង្គារ (២០ សីហា) បានត្រួតពិនិត្យកងទ័ព និងអ្នកស្ម័គ្រចិត្តរបស់ ឆេតឈ្នី ត្រៀមប្រយុទ្ធជាមួយអ៊ុយក្រែន ដែលជាដំណើរលើកដំបូងរបស់លោក ពូទីន ក្នុងរយៈពេល ១៣ឆ្នាំទៅកាន់សាធារណរដ្ឋ កូកាសខាងជើង (North Caucasus) មួយនេះ។

ដំណើរត្រួតពិនិត្យមិនធ្លាប់មានពីមុនមកទៅកាន់សាធារណរដ្ឋដែលមានជនជាតិមូស្លីមភាគច្រើននៅក្នុងផ្នែកមួយរបស់រុស្ស៊ីនេះ បានកើតឡើងនៅពេលដែលទីក្រុងមូស្គូ បន្តប្រយុទ្ធដើម្បីរុញច្រានកងកម្លាំងអ៊ុយក្រែនចេញពីតំបន់ Kursk របស់ខ្លួន រយៈពេលពីរសប្តាហ៍បន្ទាប់ពីពួកគេបានសម្រុកចូលព្រំដែននៅក្នុងការវាយលុកដ៏ធំបំផុតលើរុស្ស៊ី ចាប់តាំងពីសង្គ្រាមលោកលើកទីពីរមក។

លោក ពូទីន បានថ្លែងលើកទឹកចិត្តទាហាននៅសាកលវិទ្យាល័យកងកម្លាំងពិសេសរុស្ស៊ី ដែលជាសាលាបណ្តុះបណ្តាលនៅឆេតឈ្នី និងជំរុញឱ្យពួកគេការពារជាតិមាតុភូមិ និងបង្កើនភាពក្លាហានក្នុងការប្រយុទ្ធ។ លោក កាឌីរ៉ូវ បានប្រាប់លោក ពូទីន នៅក្នុងកិច្ចប្រជុំដាច់ដោយឡែកមួយកាលពីថ្ងៃអង្គារថា ឆេតឈ្នីបានបញ្ជូនទាហានជាង ៤៧.០០០នាក់ ចាប់តាំងពីការចាប់ផ្តើមនៃសង្រ្គាមដើម្បីប្រយុទ្ធប្រឆាំងនឹងអ៊ុយក្រែន រួមទាំងអ្នកស្ម័គ្រចិត្តប្រហែល ១៩.០០០នាក់ផងដែរ។

ការកាន់កាប់ណាមួយរបស់បរទេសលើទឹកដីរុស្ស៊ី គឺជារឿងដ៏អាម៉ាស់សម្រាប់លោក ពូទីន និងកងទ័ពរបស់លោក បើទោះបីជាកងកម្លាំងរុស្ស៊ី នៅតែបន្តវាយរុលបន្តិចម្តងៗដោយមានស្ថិរភាពនៅលើសមរភូមិជួរមុខនៅភាគខាងកើតអ៊ុយក្រែនក៏ដោយ៕