អង្គភាពសេវារថយន្តគិលានសង្គ្រោះរបស់ប្រទេសអ៊ីស្រាអែល និយាយនៅក្នុងសេចក្តីថ្លែងការណ៍ថា គ្រាប់រ៉ូកែត ដែលបានបាញ់ចេញពីប្រទេសលីបង់ ចូលទៅក្នុងសហគមន៍ Katzrin របស់អ៊ីស្រាអែល នៅតំបន់ខ្ពង់រាប Golan Heights បានធ្លាក់ទៅលើលំនៅឋានជាច្រើនខ្នង បង្កឱ្យមានអគ្គិភ័យ។

វីដេអូ ដែលបានចេញផ្សាយដោយអង្គភាពសេវានេះ បង្ហាញឱ្យឃើញពីអគ្គិភ័យ និងផ្សែងខ្មួលខ្មាញ់ហុយចេញពីលំនៅឋានមួយ ដែលរងការវាយប្រហារដោយគ្រាប់រ៉ូកែត។ 

យោធាអ៊ីស្រាអែល និយាយថា គ្រប់រ៉ូកែត ត្រូវបានដាក់គោលដៅទៅលើតំបន់ Upper Galilee និងតំបន់ខ្ពង់រាប Golan Heights ។ គ្រាប់រ៉ូកែតមួយចំនួន ត្រូវបានស្ទាក់ចាប់ ខណៈគ្រាប់រ៉ូកែតនៅសល់ បានធ្លាក់នៅតំបន់ទីវាល។

ជាការសងសឹក កងកម្លាំងទ័ពអាកាសអ៊ីស្រាអែល បានធ្វើការវាយប្រហារតាមអាកាស ដែលយោធានិយាយថា បានដាក់គោលដៅលើជើងទម្របាញ់រ៉ូកែតមួយក្នុងចំណោមជើងទម្រជាច្រើន ដែលត្រូវបានប្រើប្រាស់ក្នុងការវាយប្រហារ។

ជម្លោះឆ្លងព្រំដែនរវាងក្រុមសកម្មប្រយុទ្ធហេសបូឡាដ៏មានឥទ្ធិពលនៅប្រទេសលីបង់ និងអ៊ីស្រាអែលបាននិងកំពុងបន្ត ចាប់តាំងពីក្រុមហេសបូឡា បានប្រកាស «រណសិរ្យគាំទ្រ» ជាមួយពលរដ្ឋប៉ាឡេស្ទីន ភ្លាមៗបន្ទាប់ពីសម្ព័ន្ធមិត្តរបស់ខ្លួនគឺក្រុមហាម៉ាស បានវាយប្រហារសហគមន៍ព្រំដែនភាគខាងត្បូងអ៊ីស្រាអែល កាលពីថ្ងៃទី៧ ខែតុលា បង្កឱ្យមានការវាយលុកពីសំណាក់យោធាអ៊ីស្រាអែល នៅក្នុងតំបន់ហ្កាហ្សា។