ប្រធានាធិបតីអ៊ុយក្រែន លោក វ្ល៉ូឌីមី ហ្សេឡិនស្គី (Volodymyr Zelenskiy) បាននិយាយកាលពីថ្ងៃពុធ (២១ សីហា) ថា កងកម្លាំងអ៊ុយក្រែន បានបង្កើនការពង្រឹងទប់ទល់នឹងកងទ័ពទីក្រុងមូស្គូ នៅលើសមរភូមិក្នុងតំបន់ ផុករ៉ូវស្ក៍ (Pokrovsk) ភាគខាងកើតរបស់អ៊ុយក្រែន ខណៈនៅតែបន្តការប្រយុទ្ធក៏ខ្លាំងក្លានៅលើតំបន់ ឃើស (Kursk) តាមព្រំដែនរបស់រុស្ស៊ី។

ក្នុងសុន្ទរកថាតាមទូរទស្សន៍ លោក Zelenskiy បានជំរុញបណ្ដាដៃគូរបស់ទីក្រុងគីវ ឱ្យរក្សាកាលវិភាគដែលបានព្រមព្រៀងសម្រាប់ការផ្គត់ផ្គង់អាវុធដល់យោធាអ៊ុយក្រែន ដោយបន្ថែមថា ការវាយប្រហារដែលខ្លួនបានចាប់ផ្តើមលើតំបន់ Kursk របស់រុស្ស៊ី កាលពីថ្ងៃទី០៦ ខែសីហា កំពុងតែបន្ត ហើយកងកម្លាំងរបស់លោកបានគ្រប់គ្រងតំបន់មួយចំនួន ប៉ុន្តែមិនផ្តល់ព័ត៌មានលម្អិតបន្ថែមទេ។

អ៊ុយក្រែន បានលើកឡើងកាលពីថ្ងៃពុធថា ខ្លួនបានបំផ្លាញស្ពានបណ្ដែតរបស់រុស្ស៊ី ជាមួយនឹងអាវុធដែលផលិតដោយសហរដ្ឋអាមេរិក ដើម្បីការពារការវាយលុករបស់ខ្លួនចូលទៅក្នុងតំបន់ Kursk ខណៈដែលទីក្រុងមូស្គូនិយាយថា កងកម្លាំងរបស់ខ្លួនបានបញ្ឈប់ការវាយរុលរបស់ទីក្រុងគីវនៅទីនោះ និងបន្តមានប្រៀបនៅភាគខាងកើតអ៊ុយក្រែន។

ក្រសួងការបរទេសអ៊ុយក្រែននិយាយថា ទីក្រុងគីវ វាយដណ្ដើមបានទឹកដីកាន់តែធំនៅក្នុងតំបន់ Kursk ជាងទឹកដីដែលទីក្រុងមូស្គូ ដណ្ដើមបាននៅអ៊ុយក្រែនក្នុងឆ្នាំនេះ។ រុស្ស៊ី បានហៅការវាយលុកនេះថាជាការបង្កើនភាពតានតឹង ដោយក្រសួងការពារជាតិទីក្រុងមូស្គូនិយាយថា កងកម្លាំងខ្លួនបានកាន់កាប់តំបន់តាំងលំនៅ ហ្សេឡានេ (Zhelanne) ដែលស្ថិតនៅចម្ងាយតិចជាង ២០គីឡូម៉ែត្រ ទៅភាគខាងកើតនៃមជ្ឈមណ្ឌលដឹកជញ្ជូនតំបន់ Pokrovsk របស់អ៊ុយក្រែន៕