សន្និសីទរ៉ូបូតពិភពលោកឆ្នាំ២០២៤ (WRC) បានបើកនៅទីក្រុងប៉េកាំង ប្រទេសចិន កាលពីថ្ងៃពុធ (២១ សីហា) ដោយបានប្រមូលផ្តុំអ្នកជំនាញផ្នែកឧស្សាហកម្មរាប់រយនាក់ និងបង្ហាញពីបច្ចេកវិទ្យាជឿនលឿនដ៏ទំនើបនៅក្នុងឧស្សាហកម្មរ៉ូបូត (រូបយន្ត) ដែលកំពុងវិវឌ្ឍន៍យ៉ាងឆាប់រហ័ស។

ដោយមានអ្នកជំនាញជាង ៤០០នាក់មកពីក្នុង និងក្រៅប្រទេសចូលរួម ព្រឹត្តិការណ៍បច្ចេកវិទ្យាមួយនេះកំពុងបង្ហាញផលិតផលរ៉ូបូតកម្រិតខ្ពស់ជាង ៦០០ប្រភេទ។ អ្នកចូលរួមជាច្រើនបានចង្អុលបង្ហាញថា ការច្នៃប្រឌិតបច្ចេកវិទ្យាចុងក្រោយបង្អស់ រាប់ចាប់ពីបញ្ញាសិប្បនិមិត្ត AI ដល់ប្រព័ន្ធថ្មដែលមានប្រសិទ្ធភាពជាងមុន បានជួយបង្កើតរ៉ូបូតឲ្យកាន់តែទំនើប ជាមួយនឹងមុខងារធំទូលាយជាងមុន។

អ្នកជំនាញជឿថា វាអាចមានអត្ថប្រយោជន៍ជាក់ស្ដែងយ៉ាងច្រើន ដែលថារ៉ូបូតអាចជួយក្នុងវិស័យផ្សេងៗរួមទាំងវេជ្ជសាស្ត្រ។ អ្នកចូលរួមក្នុងព្រឹត្តិការណ៍នេះនិយាយថា ពួកគេមានការចាប់អារម្មណ៍ចំពោះការអភិវឌ្ឍដែលកំពុងត្រូវបានបង្កើតឡើងនៅក្នុងវិស័យរ៉ូបូតរបស់ចិន ខណៈមន្ត្រីចិនលើកឡើងថា ប្រទេសនេះគឺជាមជ្ឈមណ្ឌលឈានមុខគេក្នុងពិភពលោកសម្រាប់ការច្នៃប្រឌិតក្នុងវិស័យរ៉ូបូត។

សន្និសីទនេះមិនត្រឹមតែផ្តោតទៅលើការលើកកម្ពស់ការអភិវឌ្ឍឧស្សាហកម្មរ៉ូបូតនៅទីក្រុងប៉េកាំង និងតំបន់ជុំវិញរបស់ខ្លួនប៉ុណ្ណោះទេ ប៉ុន្តែក៏មានគោលបំណងបង្កើតឱកាសបន្ថែមទៀត ចំណេះដឹងបច្ចេកវិទ្យាទូលំទូលាយ និងរួមបញ្ចូលកិច្ចសហប្រតិបត្តិការជាសកលនៅទូទាំងឧស្សាហកម្មរ៉ូបូតផងដែរ។ យោងតាមអ្នករៀបចំបានឱ្យដឹងថា ក្រុមហ៊ុនលំដាប់ពិភពលោកចំនួន ១៦៩ រួមទាំង ABB, Tesla, Kuka និង SMC នឹងបង្ហាញការតាំងពិព័រណ៌ផលិតផលរ៉ូបូតជាង ៦០០ប្រភេទរបស់ពួកគេពេញមួយព្រឹត្តិការណ៍រយៈពេលប្រាំថ្ងៃ៕