ក្រុមតាលីបង់ បានហាមឃាត់អ្នករាយការណ៍ពិសេសរបស់អង្គការសហប្រជាជាតិស្តីពីស្ថានភាពសិទ្ធិមនុស្សរបស់ប្រទេសអាហ្វហ្គានីស្ថាន លោក Richard Bennett មិនឱ្យចូលប្រទេស។

ប្រភពព័ត៌មាន ដែលមានទំនាក់ទំនងជាមួយក្រុមឥអ៊ិស្លាមនិយម បានបង្ហាញពីចំណាត់ការនេះ ទៅប្រព័ន្ធផ្សព្វផ្សាយ NHK កាលពីថ្ងៃពុធ។ ប្រភពបាននិយាយថា លោក Bennett បាននិងកំពុងផ្តល់របាយការណ៍ «តែម្ខាង» អំពីស្ថានភាពសិទ្ធិមនុស្សក្នុងប្រទេសអាហ្វហ្គានីស្ថាន។

ប្រភព បានចោទប្រកាន់លោកថា បានព្យាយាមបោកបញ្ឆោតសហគមន៍អន្តរជាតិដោយការផ្សព្វផ្សាយ«ការឃោសនាអាក្រក់ៗ»។

ក្រុមតាលីបង់ បានត្រឡប់ទៅកាន់អំណាចវិញនៅអាហ្វហ្គានីស្ថាន កាលពីបីឆ្នាំមុន។ ក្រុមនេះ បានរឹតត្បិតសិទ្ធិស្ត្រីយ៉ាងខ្លាំងចំពោះការសិក្សាអប់រំ និងការងារ។ ក្មេងស្រី ត្រូវបានអនុញ្ញាតឱ្យចូលរៀននៅត្រឹមសាលាបឋមសិក្សាប៉ុណ្ណោះ ខណៈស្ត្រីត្រូវបានហាមឃាត់មិនឱ្យធ្វើការឱ្យទីភ្នាក់ងារអង្គការសហប្រជាជាតិ ឬអង្គការក្រៅរដ្ឋាភិបាល។

កាលពីពេលមុន លោក Bennett បានបង្ហាញថា ប្រជាជនអាហ្វហ្គានីស្ថានជាច្រើននិយាយថា ស្ថានភាពអាចត្រូវបានពិពណ៌នាថាជា «ការរើសអើងភេទ»។

លោក បានជំរុញយ៉ាងទទូចដល់រដ្ឋាភិបាលបណ្តោះអាសន្នរបស់ក្រុមតាលីបង់ដើម្បីធ្វើឲ្យស្ថានការណ៍ប្រសើរឡើង ខណៈមន្ត្រីក្រុមតាលីបង់និយាយថា បញ្ហាសិទ្ធិស្ត្រី ជាបញ្ហាផ្ទៃក្នុង។