អ្នកនាំពាក្យអង្គការសហប្រជាជាតិ បាននិយាយកាលពីថ្ងៃពុធថា រថយន្តដឹកជំនួយជាងដប់គ្រឿង មកពីទីភ្នាក់ងារផ្តល់ជំនួយ បានឆ្លងកាត់ចូលប្រទេសស៊ូដង់ពីច្រកព្រំដែន Adre ជាមួយប្រទេសឆាដ ដើម្បីនាំយកសម្ភារៈជំនួយសង្គ្រោះទៅកាន់តំបន់នានានៅទីក្រុង Darfur ដែលត្រូវបានគំរាមកំហែងដោយគ្រោះទុរ្ភិក្ស។

អ្នកនាំពាក្យអង្គការសហប្រជាជាតិ លោក Stephane Dujarric បាននិយាយទៅកាន់អ្នកសារព័ត៌មាននៅទីក្រុងញូវយ៉កថា កម្មវិធីស្បៀងអាហារពិភពលោក និយាយថា រថយន្តរបស់ពួកគេ បានដឹកជំនួយរួមមានទាំង ប្រេងឆា និងអង្ករ ដែលនឹងផ្តល់ប្រយោជន៍ដល់ប្រជាជនប្រហែល ១៣.០០០នាក់ កំពុងប្រឈមទៅនឹងគ្រោះទុរ្ភិក្សនៅក្នុងតំបន់ Kereneik នៅរដ្ឋ West Darfur ។

សម្រាប់ផ្នែករបស់ខ្លួន អង្គការទេសន្តប្រវេសន៍អន្តរជាតិ បាននិយាយថា សម្ភារៈជំនួយសំខាន់ៗដែលដឹកជញ្ជូនទៅប្រទេសស៊ូដង់ នឹងគាំទ្រដល់មនុស្សជាង ១២.០០០ នាក់ដែលត្រូវការជំនួយ។

ក្រុមប្រឹក្សាអធិបតេយ្យរបស់ប្រទេសស៊ូដង់ បាននិយាយកាលពីថ្ងៃព្រហស្បតិ៍សប្តាហ៍មុនថា ខ្លួននឹងអនុញ្ញាតឱ្យប្រើប្រាស់ច្រកឆ្លងកាត់ព្រំដែន Adre ជាមួយប្រទេសឆាដ សម្រាប់រយៈពេល៣ខែ ជាចំណាត់ការដែលរង់ចាំជាយូរមកហើយដោយទីភ្នាក់ងារផ្តល់ជំនួយ។

អង្គការឃ្លាំមើលពិភពលោកបាននិយាយថា មនុស្សជាង៦លាននាក់ ប្រឈមមុខទៅនឹងអសន្តិសុខស្បៀងនៅទូទាំងទីក្រុង Darfur ដែលភាគច្រើនត្រូវបានគ្រប់គ្រងដោយកងកម្លាំងគាំទ្ររហ័ស (RSF) ជាគូប្រជែងរបស់កងទ័ពនៅក្នុងសង្គ្រាមរយៈពេល១៦ខែ ហើយគ្រោះទុរ្ភិក្សបានកើតមាននៅក្នុងជំរំ Zamzam នៃរដ្ឋ North Darfur ។

រដ្ឋាភិបាលសម្ព័ន្ធមិត្តកងទ័ព បានរារាំងការផ្តល់ជំនួយកាលពីខែកុម្ភៈ តាមរយៈច្រកឆ្លងកាត់ Adre ចូលទៅក្នុងទឹកដីដែលគ្រប់គ្រងដោយកងកម្លាំងគាំទ្ររហ័ស(RSF) ដោយចោទប្រកាន់ថា វាត្រូវបានប្រើប្រាស់សម្រាប់ការដឹកជញ្ជូនអាវុធ។

អ្នកជំនាញរបស់អង្គការសហប្រជាជាតិ បានរកឃើញកាលពីដើមឆ្នាំនេះថា ការចោទប្រកាន់ថាកងកម្លាំងគាំទ្ររហ័ស(RSF) បានទទួលការដឹកជញ្ជូនអាវុធពីប្រទេសអារ៉ាប់រួមតាមរយៈប្រទេសឆាដ គឺគួរឱ្យជឿជាក់បាន។ ប៉ុន្តែប្រទេសអារ៉ាប់រួម និងកងកម្លាំងគាំទ្ររហ័ស បដិសេធរឿងនេះ។