អតីតមន្ត្រីសេតវិមាន បាននិយាយកាលពីថ្ងៃពុធថា អនុប្រធានាធិបតីលោក Kamala Harris នឹងពង្រឹងបន្ថែមទៀតនូវសម្ព័ន្ធភាព និងភាពជាដៃគូរបស់សហរដ្ឋអាមេរិកជុំវិញពិភពលោក ប្រសិនបើជាប់ឆ្នោតជាប្រធានាធិបតី ក្នុងខែវិច្ឆិកា ដោយសង្កត់ធ្ងន់ថា លោកស្រី ជឿជាក់លើការដឹកនាំរបស់អាមេរិកថា មានភាពខ្លាំងក្លា។

លោកស្រី Susan Rice ទីប្រឹក្សាសន្តិសុខជាតិពីឆ្នាំ ២០១៣-២០១៧ បានធ្វើការអត្ថាធិប្បាយ ក្នុងអំឡុងពេលសន្និសីទសារព័ត៌មាន នៅទីក្រុង Chicago ជាកន្លែងដែលសន្និបាតជាតិប្រជាធិបតេយ្យ កំពុងដំណើរការ ដើម្បីអបអរសាទរលោកស្រី Harris និងមិត្តភ័ក្តិរបស់លោកស្រីដែលកាន់តំណែងជាអភិបាលរដ្ឋមីនីសូតា ( Minnesota) លោក Tim Walz ក្នុងនាមជាបេក្ខភាពរបស់គណបក្សប្រជាធិបតេយ្យសម្រាប់ជាប្រធានាធិបតី និងអនុប្រធានាធិបតី។

ទោះបីជាលោកស្រី បានបញ្ជាក់ថា ខ្លួនមិននិយាយគាំទ្រលោកស្រី Harris ក៏ដោយ ក៏ លោកស្រី Rice បានសម្តែងនូវ «ទំនុកចិត្តកម្រិតខ្ពស់» ថា «មូលដ្ឋានគ្រឹះ»នៃគោលនយោបាយការបរទេសរបស់អាមេរិកនឹងមានភាពស៊ីសង្វាក់គ្នាជាមួយនឹងរដ្ឋបាលលោក បៃដិន។

លោកស្រី Rice បាននិយាយថា៖«លោកស្រី Harris នឹងទទួលយក និងពង្រឹងបន្ថែមទៀតនូវសម្ព័ន្ធភាព និងភាពជាដៃគូរបស់យើង នៅជុំវិញពិភពលោក មិនត្រឹមតែនៅក្នុងទ្វីបអឺរ៉ុប និងអាស៊ីប៉ុណ្ណោះទេ ប៉ុន្តែថែមទាំងនៅន្លែងមួយចំនួនដូចជា អាមេរិកឡាទីន អាហ្វ្រិក និងមជ្ឈិមបូព៌ាផងដែរ»។