ទំនងជាគ្មានបុគ្គលណាម្នាក់ នៅឯសន្និបាតគណបក្សប្រជាធិបតេយ្យ នាសប្តាហ៍នេះ នឹងមានបទពិសោធន៍ច្រើន សម្រាប់ការថ្លែងសុន្ទរកថាក្នុងព្រឹត្តិការណ៍សំខាន់ៗជាងអតីតប្រធានាធិបតីអាមេរិក លោក Bill Clinton នោះទេ។ នៅពេលរូបលោកឡើងនិយាយលើវេទិកា កាលពីយប់ថ្ងៃពុធ (ទី២១ ខែសីហា) នៅ United Center របស់ទីក្រុង Chicago នោះនឹងកត់ត្រាសុន្ទរកថាលើកទី១២ របស់លោក នៅក្នុងព្រឹត្តិការណ៍ ៤ឆ្នាំម្ដងរបស់គណបក្ស ជាកំណត់ត្រាមួយដែលធ្វើឲ្យលោកទទួលបានរហស្សនាមថា «កំពូលអ្នកពន្យល់បកស្រាយដ៏ពូកែម្នាក់»។

សុន្ទរកថារបស់លោក Clinton ឆ្លុះបញ្ជាំងពីដំណើរនយោបាយរបស់លោក ដោយមានតាំងពីជាបុគ្គលដ៏លេចធ្លោ រហូតដល់មានឈ្មោះជាប្រធានាធិបតីដែលមានស្លាកស្នាមដោយរឿងអាស្រូវ និងចុងក្រោយក្លាយជារដ្ឋបុរសដ៏ចាស់ទុំមួយរូប។ នៅវ័យ ៧៨ឆ្នាំ លោកមានអាយុដំណាលគ្នានឹងលោក Donald Trump និងអាយុប្អូនលោក Joe Biden ៣ឆ្នាំ។ គោលនយោបាយនិយមកណ្ដាលរបស់លោក ក្នុងទសវត្សរ៍ឆ្នាំ១៩៩០ បានផ្លាស់ប្តូរគណបក្សប្រជាធិបតេយ្យ ប៉ុន្តែបរិយាកាសវិវត្ត នាពេលបច្ចុប្បន្ននេះ និងចលនា #MeToo (ចលនាប្រឆាំងការរំលោភបំពានផ្លូវភេទ) បានធ្វើឲ្យកេរដំណែលរបស់លោកស្ថិតនៅក្នុងផ្លូវផ្សេង។

ទោះជាយ៉ាងនេះក្តី គណបក្សប្រជាធិបតេយ្យសង្ឃឹមថា សុន្ទរកថារបស់លោក Clinton នឹងជួយលើកតម្លៃរបស់អនុប្រធានាធិបតី លោកស្រី Kamala Harris ឲ្យកាន់តែខ្ពស់ ជាពិសេស ក្នុងចំណោមអ្នកបោះឆ្នោតស្បែកសវណ្ណៈកម្មករ ដែលចងចាំប្រធានាធិបតីទី៤២ ដោយក្តីស្រលាញ់។ ភាពប៉ិនប្រសប់របស់លោក Clinton ក្នុងការពន្យល់ពីបញ្ហាស្មុគស្មាញ ទោះបីជាសុភាសិតចាស់ថា «ប្រសិនបើអ្នកពន្យល់ អ្នកនឹងចាញ់” គឺជាទ្រព្យសម្បត្តិនយោបាយ។

គួរបញ្ជាក់ថា ដោយបានចូលរួមរាល់សន្និបាតរបស់គណបក្សប្រជាធិបតេយ្យ ចាប់តាំងពីឆ្នាំ១៩៧២ មក អាជីពនយោបាយរបស់លោក Clinton បានរួមបញ្ចូលនូវពេលវេលាគួរឲ្យកត់សម្គាល់ជាច្រើន ដូចជាសុន្ទរកថាការតែងតាំងដ៏វែងរបស់លោក ក្នុងឆ្នាំ១៩៨៨ ដែលត្រូវបានកាត់បន្ថយត្រឹមតែពាក្យថា «សូមមេត្តាចុះ! ពេលវេលារបស់អ្នកបានមកដល់ហើយ»។ 

លោកបានងើបឡើងពីភាពខុសឆ្គងនេះ បន្តឈ្នះតំណែងជាប្រធានាធិបតីនៅឆ្នាំ១៩៩២ ហើយបានថ្លែងសុន្ទរកថា ក្នុងសន្និបាត នៅឆ្នាំ១៩៩៦ និងឆ្នាំ២០០០។ ទោះបីជាមិនសូវសកម្ម ក្នុងរយៈពេលប៉ុន្មានឆ្នាំចុងក្រោយនេះ និងប្រឈមជាមួយនឹងការទទួលស្វាគមន៍ដែលមិនសូវផ្ដល់ការសាទរ តាមរយៈវីដេអូក្នុងឆ្នាំ២០២០ ក៏ដោយ ក៏សុន្ទរកថាថ្ងៃទី២១ ខែសីហា របស់លោក Clinton នឹងក្លាយជាសុន្ទរកថាដ៏សំខាន់លើកដំបូងរបស់លោកក្នុងរយៈពេល ៤ឆ្នាំ ដែលផ្តល់ឲ្យរូបលោកនូវឱកាស ក្នុងការរៀបចំការនិយាយរឿងរ៉ាវ និងគាំទ្រ ចំពោះលោកស្រី Harris ម្តងទៀត៕