អាជ្ញាធរអ៊ីស្រាអែល នៅថ្ងៃព្រហស្បតិ៍ (ទី២២ ខែសីហា) នេះ បាននិយាយថា នគរបាលអ៊ីស្រាអែលបានចាប់ខ្លួនមនុស្ស ៤នាក់ដែលត្រូវបានសង្ស័យថា បានចូលរួមក្នុងការវាយប្រហារដោយហិង្សារបស់អ្នកតាំងទីលំនៅជនជាតិជ្វីហ្វ លើភូមិ Jit របស់ប៉ាឡេស្ទីន ក្នុងកាន់កាប់តំបន់ West Bank ដែលពេលនោះ ជនជាតិប៉ាឡេស្ទីនម្នាក់ ត្រូវបានសម្លាប់។

ការវាយប្រហារ កាលពីថ្ងៃទី១៥ ខែសីហា ដោយអ្នកតាំងទីលំនៅនិគមរាប់សិបនាក់ប្រដាប់ដោយកាំភ្លើង និងគ្រាប់បែកភ្លើង បាននាំឲ្យមានការថ្កោលទោសខុសពីធម្មតាពីសំណាក់មេដឹកនាំអ៊ីស្រាអែល ក្នុងនោះរួមទាំងនាយករដ្ឋមន្ត្រី លោក Benjamin Netanyahu ផងដែរ ដែលបានសន្យាឲ្យមានការស៊ើបអង្កេតយ៉ាងឆាប់រហ័ស។

សេចក្តីថ្លែងការណ៍របស់នគរបាល និងទីភ្នាក់ងារសន្តិសុខមូលដ្ឋាល បានឲ្យដឹងថា៖ «នេះគឺជាហេតុការណ៍ភេរវកម្មធ្ងន់ធ្ងរមួយ ដែលរួមមានការដុតអគារ និងរថយន្ត ការគប់ដុំថ្ម និងការគប់គ្រាប់បែកភ្លើង ក៏ដូចជាការបាញ់ប្រហារដោយគ្រាប់ពិត ដែលបណ្តាលឲ្យពលរដ្ឋប៉ាឡេស្ទីនម្នាក់ស្លាប់ និងម្នាក់ទៀតរងរបួស»។

គួរបញ្ជាក់ថា ការកើនឡើងនូវឧប្បត្តិហេតុនៃអំពើហិង្សាលើពលរដ្ឋប៉ាឡេស្ទីន នៅតំបន់ West Bank ចាប់តាំងពីការចាប់ផ្តើមនៃសង្រ្គាមនៅតំបន់ហ្កាហ្សា បានទាក់ទាញការថ្កោលទោសជាអន្តរជាតិពីគ្រប់ទីកន្លែង ក្នុងនោះរួមទាំងពីសម្ព័ន្ធមិត្តរបស់អ៊ីស្រាអែលផងដែរ ដូចជាសហរដ្ឋអាមេរិកជាដើម៕