បាតុករគាំទ្រប៉ាឡេស្ទីនរាប់ពាន់នាក់ បានប្រមូលផ្តុំគ្នាតវ៉ាប្រឆាំងការគាំទ្ររបស់សហរដ្ឋអាមេរិក ចំពោះអ៊ីស្រាអែល ក្នុងសង្រ្គាមហ្កាហ្សា នៅថ្ងៃចុងក្រោយនៃសន្និបាតជាតិប្រជាធិបតេយ្យក្នុងទីក្រុង ឈីកាហ្គោ (Chicago) កាលពីថ្ងៃព្រហស្បតិ៍ (២២ សីហា)។

ការគាំទ្ររបស់អាមេរិកដល់អ៊ីស្រាអែល គឺជាបញ្ហាចម្រូងចម្រាស់បំផុតក្នុងចំណោមសមាជិកបក្សប្រជាធិបតេយ្យ ហើយទទួលបានការចាប់អារម្មណ៍តិចតួចណាស់នៅក្នុងសន្និបាត ដែលអាចប៉ះពាល់ដល់ពួកគេនៅពេលបោះឆ្នោត។

អនុប្រធានាធិបតីអាមេរិក លោកស្រី Kamala Harris បានទទួលការអបអរសាទរយ៉ាងខ្លាំងនៅលើវេទិកាសន្និបាត ខណៈលោកស្រីព្យាយាមបញ្ជាក់ពីខ្លួនឯងឡើងវិញដល់ពលរដ្ឋអាមេរិក និងគូរភាពផ្ទុយគ្នាជាមួយបេក្ខភាពបក្សសាធារណរដ្ឋលោក Donald Trump ក្នុងពេលទទួលយកការតែងតាំងបេក្ខភាពប្រធានាធិបតីឆ្នាំ២០២៥ ជាផ្លូវការពីបក្សប្រជាធិបតេយ្យ។

មានវត្តមាននគរបាលយ៉ាងច្រើន ខណៈក្រុមបាតុករដើរដង្ហែរតាមការផ្លូវក្នុងទីក្រុង។ ក្រៅពីនគរបាលនៅតាមផ្លូវ មានមន្ត្រីប្រហែល ១០០នាក់ដែលបំពាក់ឧបករណ៍កុបកម្ម និងរថយន្តសមត្ថកិច្ចជាង ២០គ្រឿងបានតាមដានបាតុកម្មដ៏សន្តិភាពនោះ។

នគរបាលទីក្រុង Chicago បាននិយាយកាលពីថ្ងៃព្រហស្បតិ៍ថា ពួកគេមិនផ្លាស់ប្តូរយុទ្ធសាស្ត្ររបស់ខ្លួនទេ ហើយបានត្រៀមខ្លួនរួចជាស្រេចសម្រាប់រាត្រីចុងក្រោយនៃបាតុកម្មគាំទ្រប៉ាឡេស្ទីននៅខាងក្រៅមហាសន្និបាតជាតិប្រជាធិបតេយ្យ បន្ទាប់ពីការប្រមូលផ្ដុំស្រដៀងគ្នានេះកាលពីថ្ងៃពុធ ដែលមិនបណ្តាលឱ្យមានអ្នករងរបួស ឬការចាប់ខ្លួនឡើយ៕