យន្តហោះខ្នាតតូចមួយគ្រឿងដឹកមនុស្ស ៩នាក់ បានធ្លាក់នៅជិតរដ្ឋធានីបាងកក របស់ប្រទេសថៃ កាលពីថ្ងៃព្រហស្បតិ៍ (២២ សីហា) ដោយជំរុញឱ្យមានប្រតិបត្តិការស្វែងរកដ៏ធំដែលក្រុមស្វែងរកធ្វើប្រតិបត្តិការបានឆ្លងកាត់ភក់ និងរុករកឆ្លងកាត់គម្របព្រៃដើមកោងកាងយ៉ាងក្រាស់នៅយប់ជ្រៅ។

យោងតាមអាជ្ញាធរបានឱ្យដឹងថា នៅលើយន្តហោះនោះមានអ្នកបើកយន្តហោះជនជាតិថៃ ២នាក់ រួមជាមួយនឹងជនជាតិចិន ៥នាក់ និងអ្នកដំណើរជនជាតិថៃ ២នាក់ ត្រូវគេជឿថាបានស្លាប់បាត់បង់ជីវិតក្នុងឧបទ្ទវហេតុនោះ។

យោងតាមការិយាល័យទំនាក់ទំនងសាធារណៈរបស់រដ្ឋាភិបាលខេត្ត ឆាកឈឿងសាវ (Chachoengsao) បានឱ្យដឹងថា យន្តហោះធុនតូចនេះបានចេញដំណើរពីអាកាសយានដ្ឋានអន្តរជាតិសំខាន់របស់ទីក្រុងបាងកក នៅម៉ោង ២:៤៦ នាទីរសៀល (ម៉ោងក្នុងស្រុក) ឆ្ពោះទៅកាន់អាកាសយានដ្ឋានត្រាត (Trat) នៅភាគខាងកើតនៃប្រទេស។ យន្តហោះនោះបានបាត់បង់ទំនាក់ទំនងប្រហែល ១០នាទីប៉ុណ្ណោះក្នុងការហោះហើរ។

ការិយាល័យខេត្តបាននិយាយថា បំណែកនៃយន្តហោះត្រូវបានគេរកឃើញនៅរាយប៉ាយក្នុងល្បប់ភក់ រួមនឹងបំណែករាងកាយជិត ៧០បំណែក ដែលត្រូវបានបញ្ជូនទៅមន្ទីរពេទ្យនគរបាលដើម្បីកំណត់អត្តសញ្ញាណ។ ការស្វែងរកត្រូវបានពន្យារពេលជាច្រើនម៉ោងដោយសារការលំបាកខាងភស្តុភារ ខណៈការធ្លាក់នេះបានកើតឡើងនៅក្នុងព្រៃកោងកាង ដែលដីមានសភាពសើមព្រោះតែទឹកទន្លេក្បែរនោះ។

ការិយាល័យបាននិយាយថា អាជ្ញាធរនឹងវិភាគបំណែកយន្តហោះដើម្បីកំណត់ពីមូលហេតុនៃការធ្លាក់ ដោយបន្ថែមថា យន្តហោះនោះមិនមានប្រអប់ខ្មៅទេ ហើយបានទាក់ទងដោយផ្ទាល់ជាមួយភ្នាក់ងារគ្រប់គ្រងចរាចរណ៍ផ្លូវអាកាស៕