​បាល់ទាត់៖ ​ក្រុម​យក្ស​អេ​ស្ប៉ា​ញ​ជើងឯក ៥​សម័យ FC Barcelona និង​ជើងឯក ៦​សម័យ​ក្រុម​យក្ស​អាល្លឺម៉ង់ FC Bayern Munich បាន​ធ្វើការ​ហ្វឹកហាត់​នៅ​ថ្ងៃ​ចន្ទ​ម្សិលមិញ​នេះ​មុន​ជួប​គ្នា​រាត្រី​ថ្ងៃ​អង្គារ​នេះ​ក្រប​ខណ្ឌ UEFA Champions League ដែល​ក្រុម​ទាំងពីរ​ស្ថិតក្នុង​ពូ​ល E ជាមួយគ្នា​។

​​Bayern Munich មាន​ស្ថិតិ​អស្ចារ្យ​ពេល​ជួប Barcelona ពោលគឺ​ចុងក្រោយ​បំផុត Bayern Munich បាន​យកឈ្នះ Barcelona សរុប​ទាំងពីរ​ជើង ៨-២ នៅ​វគ្គ ៨ក្រុម​ចុងក្រោយ​រដូវ​កាល ២០២០ ជា​ឆ្នាំ​ដែល Bayern Munich លើក​ពាន​នៅពេលនោះ​។ ​តែ​ក្រុម​ទាំងពីរ​មិនដែល​ជួបគ្នា​នៅក្នុង​ពូ​ល​ឡើយ​នៅ​ក្របខណ្ឌ​អឺរ៉ុប​នេះ​គិត​តាំងពី​រដូវ​កាល ១៩៩៨-៩៩ ដែល​នៅពេលនោះ​ក៏ Bayern Munich យកឈ្នះ​ទាំងពីរ​ជើង​ដែរ​គឺ ១-០ និង ២-១​។ ​​ជួរ​ប្រយុទ្ធ​របស់ Barcelona ហាក់ដូចជា​ធ្លាក់​ចុះបើ​គិតពី​ការចាកចេញ​របស់ Lionel Messi និង Antoine Griezmann ខណៈ Sergio Aguero, Ousmane Dembele និង Ansu Fati នៅតែមាន​របួស​នៅឡើយ​មានន័យថា​ ក្រុម​ដែល​កំពុងមាន​វិបត្តិ​ហិរញ្ញវត្ថុ​មួយ​នេះ​រំពឹង​លើ​ខ្សែប្រយុទ្ធ​ហូ​ឡង់ Memphis Depay និង Luuk de Jong ស្រប​ពេលដែលខ្សែប្រយុទ្ធ​ដា​ណឺ​ម៉ាក Martin Braithwaite ក៏មាន​របួស​ដែរ​។

​​ងាក​មក Bayern Munich ពួកគេ​កំពុងមាន​ជំនឿ​ចិត្ត​ក្រោយ​ទើប​យកឈ្នះ RB Leipzig ក្រៅ​ដី ៤-១ នៅ​ក្របខណ្ឌ Bundesliga អាល្លឺម៉ង់​។ ​កីឡាករ​អាល្លឺម៉ង់ Serge Gnabry ដែល​ត្រូវបាន​ផ្លាស់ចេញ​នៅ​ការប្រកួត​កាលពី​ថ្ងៃ​សៅរ៍​នោះ រំពឹងថា​នឹង​អាច​ចូល​លេង​ការប្រកួត​រាត្រី​នេះ​បាន​។ ​ក្រៅពីនោះ Bayern Munich មិនមាន​បញ្ហា​កីឡាករ​របួស​ឡើយ​៕

​អត្ថបទ​៖​នាង សុភា​វុ​ធ