ស៊ីហ្គេម៖ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើការជំរុញឲ្យវិស័យកីឡាត្រូវរៀនលេងកីឡាក្នុងដំណាក់កាលកូវីដ-១៩ ជាច្រើនឆ្នាំបន្ដទៀត ដូចទៅនឹងវិស័យផ្សេងៗដែលមានចរិតដូចៗគ្នា។
សម្ដេចតេជោនាយករដ្ឋមន្ដ្រីបានមានប្រសាសន៍បែបនេះនៅក្នុងពិធីប្រគល់-ទទួលវិមានកីឡដ្ឋាននៃពហុកីឡដ្ឋានជាតិមរតកតេជោ ដែលធ្វើឡើងក្រោមវត្តមានដ៏ខ្ពង់ខ្ពស់របស់សម្ដេច និងឯកឧត្តម វ៉ាង យី ទីប្រឹក្សារដ្ឋ និងជារដ្ឋមន្ដ្រីការបរទេសចិនកាលពីចុងសប្ដាហ៍កន្លងទៅ។ សម្ដេចតេជោ ហ៊ុន សែន បានគូសបញ្ជាក់ថា កូវីដបានបំផ្លាញនូវរបៀបរបបដែលបន្សល់ទុកពីដូនតារ៉ាប់លានឆ្នាំមកហើយ ដោយតម្រូវឲ្យយើងអង្គុយឆ្ងាយពីគ្នាយ៉ាងតិច ១ម៉ែត្រកន្លះ ពាក់ម៉ាស់ ធ្លាប់ដាក់មនុស្សច្រើន តែដាក់មនុស្សតិច ដល់ពេលខាងមុខ ក៏ត្រូវរៀនលេងកីឡាក្នុងដំណាក់កាលកូវីដ ត្រូវរៀនលេងរបៀបម៉េច ត្រូវរស់រស់នៅជាមួយកូវីដច្រើនឆ្នាំទៅមុខទៀត គ្រប់វិស័យទាំងអស់។ សម្ដេចបន្ថែមថា ប្រហែលមានតែវិស័យកសិកម្មប្រពៃណីខ្លះប៉ុណ្ណោះដែលមិនសូវមានការប្រែប្រួល តែវិស័យផ្សេងៗ ទាំងវិស័យឧស្សាហកម្ម វិស័យសេវា ពិសេសវិស័យកីឡាសុទ្ធតែមានកការប្រែប្រួល ដែលតម្រូវឲ្យរស់នៅតាមគន្លងថ្មី។
គួរដឹងថា កាលពីថ្មីៗរាជរដ្ឋាភិបាលកម្ពុជាក៏បានចេញ ស.ជ.ណ អនុញ្ញាតឲ្យក្រុមជម្រើសជាតិបើកការហ្វឹកហាត់ឡើងវិញផងដែរ តែត្រូវគោរពយ៉ាងម៉ឹងម៉ាត់តាមគោលការណ៍បិទខ្ទប់ហ្វឹកហាត់ គោរពវិធានការសុខាភិបាល ហើយគ្រូបង្វឹក កីឡាករ-កីឡាការិនីទាំងអស់មិនអនុញ្ញាតឲ្យចេញ-ចូលដោយគ្មានការអនុញ្ញាតនោះទេ ទោះបីមានការចាក់វ៉ាក់សាំង ២ដូស ឬ ៣ដូសហើយក៏ដោយ។ បច្ចុប្បន្នស្ថាបនអាណាព្យាបាលកីឡា ពិសេសក្រសួងអប់រំ យុវជន និងកីឡា កំពុងធ្វើការជាមួយគណៈកម្មាធិការជាតិអូឡាំពិកកម្ពុជា និងសហព័ន្ធកីឡាជាតិ ក្នុងការរៀបចំការប្រមូលផ្ដុំលក្ខណៈបិទខ្ទប់នៅពហុកីឡដ្ឋានជាតិមរតកតេជោ ក៏ដូចជាតាមទីតាំងសុវត្ថិភាពមួយចំនួនតាមការណែនាំរបស់ប្រមុខរាជរដ្ឋាភិបាល ដើម្បីជំរុញការហ្វឹកហាត់ និងពង្រឹងសមត្ថភាពបច្ចេកទេសត្រៀមការប្រកួតកីឡាស៊ីហ្គេមនាពេលខាងមុខ ពិសេសដំណើរឆ្ពោះទៅស៊ីហ្គេមឆ្នាំ២០២៣ នៅកម្ពុជា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
