​បាល់ទាត់៖ ​ក្រុម​បិសាច​ក្រហម Manchester United បាន​បើក​ទំព័រ​ក្រប​ខណ្ឌ UEFA Champions League រដូវ​កាល​នេះជាមួយ​នឹង​បរាជ័យ​នៅ​ទឹកដី​ស្វ៊ី​ស Young Boys ២-១​។ ​​ថ្វីបើ Cristiano Ronaldo បើក​រក​បាន​គ្រាប់​នាំមុខ​តាំងពី​នាទី​ទី១៣ តែ​ក្រុម​របស់​លោក Ole Gunnar Solskjaer ក៏​បាត់បង់ Aaron Wan Bissaka មុន​ចប់​វគ្គ​ទី​១​។

Young Boys ក៏​តាម​ស្មើ​វិញ​នៅ​នាទី​ទី៦៦ ដោយ Nicolas Ngamaleu និង​គ្រាប់​ជ័យជំនះ​នៅ​នាទី​ទី៩០+៥ ដោយ Jordan Siebatcheu​។ ​ងាក​មក​ជំនួប​រវាង​ក្រុម​យក្ស​ទាំងពីរ Bayern Munich បាន​លើកទ័ព​ទៅយក​ ៣​ពិន្ទុ​ពី​ទឹកដី Barcelona ដោយ​លទ្ធផល ៣-០​។ ​ជាថ្មីទៀត Robert Lewandowski នៅតែ​បន្ត​ស៊ុត​បញ្ចូល​ទី​បាន​ដោយ​រកបាន​ ២​គ្រាប់​ក្នុងការ​ប្រកួត​បន្ទា​ប់​ពី Thomas Muller ជា​អ្នក​រកបាន​គ្រាប់​នាំមុខ​ដំបូង​។ ​ងាក​មក​តោ​ខៀវ Chelsea បានចាប់ផ្តើម​ដំណើរ​ការពារ​ជើងឯក​របស់ខ្លួន​ជាមួយនឹង​ជ័យជំនះ ១-០ នៅ Stamford Bridge លើ​ក្រុម​ភ្ញៀវ​រុស្ស៊ី Zenit Petersburg​។

​​មួយ​គ្រាប់​នេះ​សំរេច​ដោយ​ខ្សែប្រយុទ្ធ​ប៊ែ​ល​ហ្ស៊ិ​ក Romelu Lukaku នៅ​នាទី​ទី៦៩​។ ​ចំណែក​សេះបង្កង់ Juventus ទីបំផុត​រកបាន​ជ័យជំនះ​ដំបូង​របស់ខ្លួន​ក្នុង​រដូវ​កាល​នេះ ​ដោយ​យកឈ្នះ​នៅ​ទឹកដី Malmo FF ៣-០​។ ​បី​គ្រាប់​ដោយ​កីឡាករ ៣នាក់​រួមមាន Sandro, Paulo Dybala និង Alvaro Morata​។​ ​លទ្ធផល​ផ្សេងទៀត​កាលពី​យប់មិញ​ផងដែរ​រួមមាន Sevilla ធ្វើ​អ្វី Salzburg មិនបាន បាន​ត្រឹម​ស្មើ​ក្នុង​ទឹកដី​ខ្លួនឯង ១-១ ខណៈ Villarreal ក៏​ស្មើគ្នា​នឹង Atalanta ២-២ ឯ Dynamo Kiyv ក៏​ស្មើគ្នា​នឹង Benfica ១-១ និង Lille ក៏​ស្មើគ្នា​នឹង Wolfsburg ០-០ ផង​ដែរ​៕

​អត្ថបទ​៖​នាង សុភា​វុ​ធ