ប្រទេសថៃ បានបង្កើនការឃ្លាំមើល និងវិធានការបង្ការ ដើម្បីទប់ស្កាត់ការរីករាលដាលនៃវីរុសជំងឺអុតស្វា ឬហៅថាជំងឺអឹមផក (Mpox) បន្ទាប់ពីបានបញ្ជាក់ពីករណីដំបូងរបស់ខ្លួននៃវីរុស ខ្លេដ ១ប៊ី (Clade 1b) ដែលអាចចម្លងបានខ្ពស់។ អ្នកឆ្លងគឺជាបុរសជនជាតិអ៊ឺរ៉ុបវ័យ ៦៦ឆ្នាំ ដែលពីមុនបានធ្វើដំណើរទៅទ្វីបអាហ្រ្វិកមុនពេលចូលក្នុងប្រទេសថៃកាលពីសប្តាហ៍មុន។ នេះជាករណីដំបូងហើយដែលបានបញ្ជាក់ថាជាវីរុសប្រភេទ ខ្លេដ ១ប៊ី នៅអាស៊ី។

យោងតាមនាយកដ្ឋានគ្រប់គ្រងជំងឺ (DDC) របស់ប្រទេសថៃ បុរសនោះត្រូវបានគេដាក់ឱ្យនៅដាច់ដោយឡែកក្នុងមន្ទីរពេទ្យ។ មន្ត្រីម្នាក់របស់នាយកដ្ឋា DDC បាននិយាយថា អ្នកឆ្លងនោះបានទៅដល់ថៃកាលពីថ្ងៃទី១៤ ខែសីហា តាមជើងហោះហើរតភ្ជាប់ពីមជ្ឈិមបូព៌ា ដោយបន្ថែមថា មន្ត្រីបានបញ្ជូនក្រុមមួយដើម្បីពិនិត្យមើល និងតាមដានបុគ្គលចំនួន ៤៣នាក់ ដែលមានទំនាក់ទំនងជិតស្និទ្ធជាមួយអ្នកជំងឺនោះ។

ក្រៅពីថៃ ប្រទេសផ្សេងទៀតនៅអាស៊ីក៏បានរាយការណ៍ករណីឆ្លងក្នុងខែនេះដែរ។ ប៉ាគីស្ថាន និងហ្វីលីពីន បានប្រកាសថារកឃើញករណីមួយនៃប្រភេទ ខ្លេដ២ (Clade II) កម្រិតស្រាល។ អង្គការសុខភាពពិភពលោក (WHO) បានប្រកាសកាលពីថ្ងៃពុធសប្តាហ៍មុនថា ជំងឺអឹមផក ដែលពីមុនត្រូវបានគេស្គាល់ថាជាជំងឺអុតស្វា គឺជាភាពអាសន្នសុខភាពជាអន្តរជាតិ ដោយបង្កើនការជូនដំណឹងពីលទ្ធភាពនៃការឆ្លងរាលដាលទូទាំងពិភពលោក។

ទិន្នន័យរបស់ WHO បង្ហាញថា ក្នុងពេល ៦ខែកន្លងមកនេះ អាហ្រ្វិកគឺជាតំបន់ដែលរងផលប៉ះពាល់ខ្លាំងជាងគេ ដែលមានជាង ៣.០០០ករណី និងមានអ្នកស្លាប់ចំនួន ២៣នាក់ត្រូវបានរាយការណ៍។ ទ្វីបអាមេរិកបានឃើញករណីជាង ២.០០០ករណីក្នុងរយៈពេលដូចគ្នា ខណៈអឺរ៉ុប បានរាយការណ៍តែជាង ៨០០ ករណីប៉ុណ្ណោះ។ នៅទូទាំងពិភពលោក ជំងឺអឹមផក ត្រូវបានរាយការណ៍ក្នុងរដ្ឋសមាជិកចំនួន១២១ នៅទូទាំងតំបន់ទាំងប្រាំ៦ របស់ WHO។ គិតត្រឹមខែកក្កដាឆ្នាំនេះ ករណីដែលបានបញ្ជាក់ជិត ១០៣.០០០ត្រូវបានរាយការណ៍ រួមទាំងអ្នកស្លាប់ចំនួន ២២៣នាក់៕