ជនភៀសខ្លួនរ៉ូហ៊ីងយ៉ា រាប់ម៉ឺននាក់បានប្រមូលផ្តុំគ្នាតវ៉ានៅជំរំភៀសខ្លួនក្នុងប្រទេសបង់ក្លាដែស កាលពីថ្ងៃអាទិត្យ (២៥ សីហា) ក្នុងខួបលើកទីប្រាំពីរនៃការបង្ក្រាបពីយោធាមីយ៉ាន់ម៉ា ដែលបានបង្ខំឱ្យពួកគេភៀសខ្លួន ដោយទាមទារឱ្យបញ្ចប់អំពើហិង្សា និងការវិលត្រឡប់ទៅកាន់សហភាពមីយ៉ាន់ម៉ាវិញដោយសុវត្ថិភាព។

ជនជាតិភាគតិចរ៉ូហ៊ីងយ៉ាជាងមួយលាននាក់រស់នៅក្នុងជំរំដ៏ចាស់ទ្រុឌទ្រោមនៅភាគខាងត្បូងបង់ក្លាដែស ជាមួយនឹងក្តីសង្ឃឹមតិចតួចបំផុតក្នុងការវិលត្រឡប់ទៅមាតុភូមិវិញ ជាទីដែលពួកគេភាគច្រើនត្រូវបានបដិសេធមិនទទួលបានសញ្ជាតិ និងសិទ្ធិផ្សេងទៀត។ មនុស្សរាប់ពាន់នាក់ទៀតត្រូវ គេជឿថាបានភៀសខ្លួនចេញពីរដ្ឋរ៉ាឃីន (Rakhine) របស់មីយ៉ាន់ម៉ា ក្នុងប៉ុន្មានសប្តាហ៍ថ្មីៗនេះ ដោយសារការប្រយុទ្ធគ្នាកាន់តែកើនឡើងរវាងកងទ័ពនៃរបបសឹកកំពុងកាន់អំណាច និងកងទ័ពអារ៉ាកាន (Arakan) ដែលជាកងជីវពលជនជាតិភាគតិចដ៏មានឥទ្ធិពល។

ជនភៀសខ្លួនជាច្រើន រាប់ចាប់ពីកុមាររហូតដល់មនុស្សចាស់ បានស្រែកពាក្យតវ៉ានៅក្នុងជំរំនានាក្នុងទីក្រុង ខកស៍បាហ្សា (Cox's Bazar) ដោយមនុស្សជាច្រើនកាន់បដាសរសេរថា «ក្តីសង្ឃឹមត្រឡប់ទៅផ្ទះ» និង «ជនជាតិរ៉ូហ៊ីងយ៉ាគឺជាពលរដ្ឋមីយ៉ាន់ម៉ា»។ ជនភៀសខ្លួនម្នាក់ក្នុងការប្រមូលផ្ដុំនោះបាននិយាយថា «សូមបញ្ឈប់អំពើហិង្សា និងការវាយប្រហារលើសហគមន៍រ៉ូហ៊ីងយ៉ាជាបន្ទាន់»។

ការវាយប្រហារចុងក្រោយជាច្រើនគឺជាអំពើហិង្សាដ៏អាក្រក់បំផុតប្រឆាំងនឹងជនជាតិរ៉ូហ៊ីងយ៉ា ចាប់តាំងពីយុទ្ធនាការដឹកនាំដោយយោធាមីយ៉ាន់ម៉ាឆ្នាំ២០១៧ ដែលអង្គការសហប្រជាជាតិបានពិពណ៌នាថា មានចេតនាប្រល័យពូជសាសន៍ ដោយបានបង្ខំមនុស្សជាង ៧៣.០០០នាក់ឱ្យភៀសខ្លួនឆ្លងព្រំដែនបង់ក្លាដែស៕