បារាំង៖ បុគ្គលិកសុខាភិបាលប្រមាណ ២០០នាក់បានធ្វើការតវ៉ាកាលពីថ្ងៃអង្គារ នៅខាងក្រៅ ក្រសួងសុខាភិបាលក្នុងទីក្រុងប៉ារីស បន្ទាប់ពីអាជ្ញាធរសុខាភិបាលប្រទេសបារាំងបាននិយាយថា អ្នកដែលមិនអាចផ្តល់ភស្តុតាងនៃការចាក់វ៉ាក់សាំងបង្ការវីរុស COVID-19 អាចត្រូវបានព្យួរការងារចាប់ពីថ្ងៃពុធនេះ។
អាជ្ញាធរបានប្រកាសកាលពីថ្ងៃអង្គារថា បុគ្គលិកសុខាភិបាលប្រមាណ ៣០ម៉ឺននាក់នៅតែមិនចាក់វ៉ាក់សាំង ទោះបីជាស្ថិតក្រោមការគំរាមព្យួរការងារក៏ដោយ។ បុគ្គលិកសុខាភិបាលដឹកនាំដោយសហជីពចំនួន ២ បានតវ៉ាប្រឆាំងនឹងវិធានការនេះ។ ក្រុមអ្នកតវ៉ាភាគច្រើនបានចាក់វ៉ាក់សាំងរួចហើយ ប៉ុន្តែបានមកបង្ហាញការគាំទ្រដល់អ្នករួមការងាររបស់ពួកគេ ដែលប្រឈមនឹងការព្យួរការងារ។ លោក Rachid Ouchem ជំនួយការផ្នែកចិត្តសាស្ត្រនៃវេជ្ជសាស្ត្រនៅមន្ទីរពេទ្យ Plaisir បាននិយាយថា លោកមិនចាក់វ៉ាក់សាំងនោះទេ ទោះបីដឹងថា លោកនឹងត្រូវព្យួរការងារពីថ្ងៃពុធនេះក៏ដោយ។ លោកនិយាយថា ខ្ញុំមិនមែនជាអ្នកបដិវត្តន៍នោះទេ ខ្ញុំគ្រាន់តែខ្លាច ហើយមានមនុស្សរាប់ម៉ឺននាក់ស្ថិតនៅក្នុងស្ថានភាពបែបនេះ។
សហជីពបុគ្គលិកសុខាភិបាលអាចគាំទ្រការចាក់វ៉ាក់សាំង ប៉ុន្តែពួកគេចង់អោយអាជ្ញាធរផ្តល់ពេលដល់អ្នកមិនចាក់វ៉ាក់សាំងបន្ថែមទៀត ខណៈវីរុសឆ្លងនៅតែបន្ត ហើយការព្យួរការងារអាចប៉ះពាល់ដល់ការផ្តល់ការថែទាំដល់អ្នកជំងឺ។ អ្វីដែលចាំបាច់នៅពេលនេះគឺរក្សាការងាររបស់សហការីរបស់យើង ខណៈដែលយើងនៅតែមានអ្នកជំងឺចំនួន ២.០០០នាក់នៅក្នុងបន្ទប់សង្គ្រោះបន្ទាន់ ប្រជាជនជិត ៤៤លាននាក់ ឬ ៦៥.៦% នៃប្រជាជនបារាំងបានចាក់វ៉ាក់សាំងការពារពេញលេញ។ រហូតមកដល់ពេលនេះប្រទេសបារាំងមានករណីឆ្លងវីរុស COVID-19 សរុប ៦,៩១៧,៤៦០ករណី និងមានអ្នកស្លាប់ ១១៥,៦៩៧នាក់៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
