ប្រទេសប្រេស៊ីល បញ្ជូនយន្តហោះយោធាដែលជាផ្នែកមួយនៃ «សង្រ្គាម» ប្រឆាំងនឹងចំហេះព្រៃដែលកំពុងបង្កការបំផ្លិចបំផ្លាញក្នុងរដ្ឋ សៅប៉ូឡូ (Sao Paulo) ភាគអាគ្នេយ៍ ដោយអាជ្ញាធរបានព្រមានកាលពីថ្ងៃអាទិត្យ (២៥ សីហា) ថាមានមនុស្សកំពុងដុតភ្លើងដោយចេតនាដែលបង្កជាចំហេះដ៏សន្ធោរសន្ធៅជាច្រើន។

បន្ទាប់ពីកិច្ចប្រជុំវិបត្តិនៃគណៈរដ្ឋមន្ត្រីរបស់លោកប្រធានាធិបតី លូអ៊ីស អ៊ីណាស៊ីអូ លូឡា ដាស៊ីលវ៉ា (Luiz Inacio Lula da Silva) រដ្ឋមន្ត្រីក្រសួងបរិស្ថាន លោកស្រី ម៉ារីណា ស៊ីលវ៉ា (Marina Silva) បានប្រកាស «សង្រ្គាមប្រឆាំងនឹងចំហេះ» ហើយនិយាយថា នគរបាលសហព័ន្ធកំពុងស៊ើបអង្កេត «ស្ថានភាពមិនប្រក្រតី» ដែលបណ្តាលឱ្យមានការខូចខាតយ៉ាងទូលំទូលាយ។

លោកប្រធានាធិបតី Lula បាននិយាយក្នុងវីដេអូមួយបន្ទាប់ពីបានជួបលោកស្រី Silva ថា៖ «រហូតមកដល់ពេលនេះ យើងមិនបានរកឃើញចំហេះដែលបង្កឡើងដោយរន្ទះទេ ដែលមានន័យថាមានមនុស្សកំពុងបញ្ឆេះអណ្តាតភ្លើង»។ លោក តាស៊ីស៊ីអូ ដេហ្រ្វេតាស (Tarcisio de Freitas) អភិបាលរដ្ឋ សៅប៉ូឡូ ដែលមានប្រជាជនប្រហែល ៤៤លាននាក់ច្រើនបំផុតរបស់ប្រស៊ីល បានប្រកាសគ្រាអាសន្ននៅក្នុងក្រុងចំនួន៤៥ ហើយនិយាយថា មនុស្សពីរនាក់ដែលសង្ស័យថាបានបង្កឱ្យមានចំហេះព្រៃត្រូវបានចាប់ខ្លួន។

យោងតាមវិទ្យាស្ថានជាតិស្រាវជ្រាវអវកាសបានឱ្យដឹងថា ស្របពេលមានគ្រោះរាំងស្ងួតដ៏យូរ រដ្ឋសៅប៉ូឡូ កំពុងជួបប្រទះខែដ៏អាក្រក់បំផុតសម្រាប់ចំហេះព្រៃក្នុងរយៈពេលជាច្រើនទសវត្សរ៍ ដោយមានចំណុចចំហេះដាច់ដោយឡែកពីគ្នារហូតដល់ទៅ ៣.៤៨០កន្លែង៕