ទឹកជំនន់ដ៏គំហុកនៅក្នុងឧទ្យានជាតិដ៏ពេញនិយម ហ្រ្គែន ខេនយន (Grand Canyon) នៅរដ្ឋអារីហ្សូណា (Arizona) សហរដ្ឋអាមេរិក បានបង្ខំឱ្យសមាជិកកុលសម្ព័ន្ធ និងអ្នកទេសចរជាង ១០០នាក់នៅជិតទឹកធ្លាក់ ហាវ៉ាស៊ូផៃ (Havasupai) ត្រូវជម្លៀសខ្លួនតាមរយៈឧទ្ធម្ភាគចក្រចាប់តាំងពីថ្ងៃព្រហស្បតិ៍ សប្តាហ៍មុនមក ដែលបានសម្លាប់មនុស្សយ៉ាងហោចណាស់ម្នាក់។

ក្រុមមន្ត្រីបាននិយាយថា សាកសពស្ត្រីម្នាក់ដែលបានបាត់ខ្លួនអស់រយៈពេល ៣ថ្ងៃ ត្រូវបានរកឃើញកាលពីថ្ងៃអាទិត្យ (២៥ សីហា) បន្ទាប់ពីនាងត្រូវបានទឹកហូរនាំទៅនៅជិតជ្រលងទេសចរណ៍ដ៏ស្រស់ស្អាត Grand Canyon នេះ។

សេវាឧទ្យានជាតិអាមេរិក បាននិយាយនៅក្នុងសេចក្តីថ្លែងការណ៍មួយថា សាកសពរបស់ស្រ្តីរងគ្រោះឈ្មោះ ឆេណូអា នីកឃើសុន (Chenoa Nickerson) វ័យ ៣៣ឆ្នាំ ត្រូវបានរកឃើញតាមដងទន្លេរដ្ឋ ខូឡូរ៉ាដូ (Colorado) ចម្ងាយប្រហែល ៣០គីឡូម៉ែត្រ ពីកន្លែងដែលនាងបានបាត់ខ្លួនកាលពីថ្ងៃព្រហស្បតិ៍។

សេវាឧទ្យានបាននិយាយថា នារីរងគ្រោះរូបនេះត្រូវបានទឹកហូរនាំទៅក្នុងទន្លេ ហាវ៉ាស៊ូ ក្រិក (Havasu Creek) ដោយមិនបានពាក់អាវពោង។ ក្រុមប្រឹក្សាកុលសម្ព័ន្ធនៅតំបន់ទឹកធ្លាក់ Havasupai កាលពីថ្ងៃសៅរ៍បានប្រកាសថាបិទដែនដីរបស់ខ្លួនមិនឱ្យភ្ញៀវទេសចរទៅកម្សាន្តទេ រហូតដល់មានការជូនដំណឹងបន្ថែម ដោយសារតែទឹកជំនន់យ៉ាងទូលំទូលាយនេះ៕